Azərbaycanın yeni müdafiə naziri cəbhə bölgəsində olub (FOTO)

Azərbaycan, Bakı, 7 noyabr /Trend/

Azərbaycanın müdafiə naziri general-polkovnik Zakir Həsənov və müdafiə nazirinin birinci müavini - Silahlı Qüvvələrin Baş Qərargah rəisi general-polkovnik Nəcməddin Sadıkov cəbhə bölgəsinə səfər ediblər.

Trend-in Müdafiə Nazirliyinin rəsmi saytına istinadən verdiyi məlumata görə, səfər şəxsi heyətlə görüş və hərbi hissələrlə tanışlıq xarakteri daşıyır.

Səfər zamanı döyüş bölgəsində yerləşən hərbi hissələrə baş çəkilib, mövcud vəziyyətlə tanış olunub, təmas xəttində döyüş növbəsi çəkən əsgər və zabitlərlə görüşlər keçirilib. Fərqlənən bir qrup hərbçiyə növbəti rütbələr verilib, medal və qiymətli hədiyyələr təqdim olunub.

Təmas xəttində olan bölmələrin döyüş qabiliyyəti, əsgərlərin mənəvi-psixoloji durumu və onların sosial şəraiti, zabit və gizir heyətinin hazırlıq səviyyəsi, hərbi birləşmələrin maddi-texniki təminatı, silah və sursatla təchizatının vəziyyəti öyrənilib.

Komandir heyətinin məruzə və təklifləri dinlənilib, döyüş hazırlığının və nizam-intizamın gücləndirilməsi, həmçinin hərbi qulluqçuların sosial şəraitinin daha da yaxşılaşdırılması ilə əlaqədar tapşırıqlar verilib.