Azərbaycan, Bakı, 12 fevral /Trend, müxbir S.Ağayeva/
Azərbaycan və Serbiya hökumətləri iqtisadi sahədə əməkdaşlığın inkişafı imkanlarını nəzərdən keçirəcəklər. Danışıqlar ticari-iqtisadi, elmi-texniki əməkdaşlıq üzrə hökumətlərarası komissiyanın martın 3-5-də Belqradda keçirilməsi gözlənilən iclasında baş tutacaq. Bunu Trend-ə Serbiyanın Azərbaycandakı səfiri Zoran Voyoviç deyib.
Diplomat bildirib: "Biz hökumətlərarası komissiyanın iclasının gündəliyinin və imzalanacaq layihə sənədlərinin razılaşdırılması mərhələsindəyik".
Azərbaycan tərəfindən komissiyaya iqtisadiyyat və sənaye naziri Şahin Mustafayev, Serbiya tərəfdən isə Baş nazirin müavini, xarici və daxili ticarət və telekommunikasiya naziri Rasim Lyayiç başçılıq edir.
Səfir qeyd edib: "İki ölkənin müxtəlif nazirlikləri və qurumlarının nümayəndələri arasında konkret danışıqların keçirilməsini planlaşdırırıq".
Z.Voyoviç bildirib ki, Serbiya tərəfi hər şeydən əvvəl investisiya layihələrinə maraq göstərir.
Serbiya tərəfinin məlumatına əsasən, 2013-cü ildə iki ölkə arasında əmtəə dövriyyəsinin həcmi 60 milyon avro təşkil edib.