Bakı. Trend:
Fevralın 26-da Qərbi Avstraliya parlamentində Xocalı soyqırımının qurbanlarının xatirəsinə həsr edilmiş tədbir keçirilib.
Trend-in məlumatına görə, tədbir Avstraliya-Azərbaycan parlamentlərarası dostluq qrupunun sədri, parlamentin deputatı Lyuk Simpkins tərəfindən təşkil edilib.
Tədbirdə Milli Məclisin deputatı, Azərbaycan-Avstraliya parlamentlərarası əlaqələr üzrə işçi qrupunun rəhbəri Xanlar Fətiyev iştirak edib.
Tədbir iştirakçılarına Ermənistan-Azərbaycan, Dağlıq Qarabağ münaqişəsi, Azərbaycan torpaqlarının işğalı və Xocalıda törədilmiş soyqırım barədə məlumat verilib, materiallar təqdim edilib.
Həmçinin Heydər Əliyev Fondunun vitse-prezidenti Leyla Əliyevanın təşəbbüskarı olduğu "Xocalıya ədalət" kampaniyası barədə informasiya təqdim olunub.
Tədbirdə parlamentin deputatları, Avstraliya-Azərbaycan Dostluq Assosiasiyasının üzvləri, ictimaiyyət nümayəndələri də iştirak ediblər.