"Monitor" jurnalının baş redaktoru mərhum Elmar Hüseynovun qətlinin üstünün açılması, cinayətkarların tapılıb cəzalandırılması tələbləri ilə iyulun 17-də Bakıda keçiriləcək mitinq-yürüşlə bağlı iyulun 7-də Bakı Şəhər İcra Hakimiyyətinə müraciət olunub.
Bu barədə Trend ə aksiyanın təşkilatçılarından olan "Çap evi" mətbəəsinin rəhbəri Şahbaz Xuduoğlu məlumat verib. O, bildirib ki, iyulun 17-də - mərhum Elmar Hüseynovun doğum günündə geniş aksiya keçiriləcək. Saat 17.00-da Milli Elmlər Akademiyasının qarşısında mitinq olacaq, sonra oradan üçüncü Fəxri Xiyabana qədər yürüş keçiriləcək.
Fəxri Xiyabanda Elmar Hüseynovun məzarı ziyarət olunacaq. Aksiyada iştirak etmələri üçün kütləvi informasiya vasitələrinə, ictimai qurumlara, siyasi partiyalara müraciət edilib, E.Hüseynovun qətlini pisləyən, cinayətin açılmasının maratında olan hər kəs bu tədbirə qalılmağa çağırılıb.
Aksiyada "Elmar Hüseynovun qatilləri və sifarişçiləri tapılsın!", "Cinayətkarlar cəzalandırılsın!", "Jurnalistlərə təzyiqlərə son qoyulsun!" kimi tələblər səsləndiriləcək.
Aksiyanın əsas tələblərindən biri də qətllə bağlı istintaqın Milli Təhlükəsizlik Nazirliyindən (MTN) alınmasındır. Aksiyanın təşkilatçıları hesab edirlər ki, MTN tərəfindən aparılan istinaq arxa planda qalır, heç bir ciddi nəticə vermir və jurnalistlərin nazirlik rəhbərliyi ilə görüşməyə müvəffəq olmamaları da bunu göstərir.
Ona görə də aksiya təşkilatlçıları tələb edirlər ki, dövlət orqanlarına tabe olmayan, lakin hüquq-mühafizə orqanlarının peşəkar mütəxəssislərindən, həmçinin ictimaiyyət nümayəndələrindən ibarət müstəqil istintaq qrupu yaradılsın. E.Hüseynovun qətlinin açılması da həmin istintaq qrupuna həvalə edilsin.
