"Azərbaycan Liberal Partiyası və Milli Birlik Hərəkatının "Azadlıq" seçki bloku ilə əməkdaşlıqdan imtina etməsi barədə yayılan məlumatlar yanlışdır. "Azadlıq" blokunun həmsədrlərdən biri Sərdar Cəlaloğlu ilə danışıqlar aparmışıq, onların 25 sentyabr mitinqindən sonra qarşılıqlı əməkdaşlıq məsələsi həllini tapacaq". Bu fikirləri Trend ə açıqlamasında Liberal Partiyanın İcraiyyə Komitəsinin sədri Əvəz Temirxan bildirib.
O, qeyd edib ki, Lalə Şövkətin liderlik etdiyi "Milli Birlik" Hərəkatı və Liberal Partiyası "Azadlıq" bloku ilə mitinqdən sonra reallaşacaq əməkdaşlığı həm saziş şəklində, həm şifahi razılaşma formasında ola bilər. Əməkdaşlığın şərtlərinə görə, tərəflər seçkidə bir-birinin əleyhinə təbliğat aparmamalı, namizədlərinə qarşılıqlı dəstək verməli, seçkidən sonra baş verə biləcək qanun pozuntularına qarşı birgə mübarizə aparmalıdırlar.
Qeyd edək ki, Liberal Partiya "Azadlıq" blokunun liderlərinin namizədliyini verdiyi dairələrdə öz namizədlərini irəli sürməyib. Əvəz Temirxan onu da bildirib ki, Liberal Partiya "Azadlıq" blokunun liderlərindən biri, ADP sədri Rəsul Quliyevin hüquqlarını müdafiə edən Milli Komitəyə üzv olub: "Biz Rəsul Quliyevin ölkəyə qayıdışı və seçkidə iştirakının təmin olunması üçün əlimizdən gələn köməkliyi göstərəcəyik. Onun müdafiə komitəsinə qoşulmağımız da "Azadlıq" bloku ilə əməkdaşlığımızın bir nümunəsidir"-deyə Liberal Partiyasının rəhbəri vurğulayıb.