"Azadlıq" və "Yeni Siyasət" seçki blokları arasında saziş bağlanmayacaq. "Yeni Siyasət" bloku Koordinasiya Şurasının üzvü, Azərbaycan Milli İstiqlal Partiyasının (AMİP) sədri Əli Əliyev Trend ə açıqlamasında bildirib ki, həmin saziş layihəsinin bir sıra bəndləri bügünkü günün reallıqları ilə səsləşmir. Ona görə də bloklar arasında saziş imzalanmaya bilər. Amma Ə.Əliyev "Azadlıq" və "Yeni Siyasət" arasında əməkdaşlığın mövcud olduğunu və bunun sonadək də davam etdiriləcəyinə dair tərəflərin razılığa gəldiyini deyib.
Əli Əliyevlin sözlərinə görə, bu razılaşma "Azadlıq" blokunun həmtəsisçisi, Azərbaycan Demokrat Partiyası (ADP) sədrinin birinci müavini Sərdar Cəlaloğlu ilə görüşündə əldə olunub: "Sərdar Cəlaloğlu ilə birgə "Azadlıq" və "Yeni Siyasət" bloklarının əməkdaşlığı və seçkidə vahid namizədlərlə iştirakı məsələsini müzakirə etdik. Hər iki blokun seçkidə fəaliyyətinin koordinasiya edilməsini və mümkün olan dairələrdə vahid namizədlə fərdi qaydada iştirak etməyi qərara aldıq", - deyə Ə.Əliyev bildirib.
