Noyabrın 23-də Parisdə Avropa Şurası Parlament Assambleyasının Monitorinq Komitəsinin Azərbaycanda 6 noyabr parlament seçkilərinin yekunlarının da müzakirə olunacağı iclası keçiriləcək. Trend in AŞ katibliyinə istinadən xəbər verdiyi kimi, Komitənin iclasının açılışında AŞ PA prezidenti Rene Van der Lindenin çıxışı gözlənilir.
Komitənin gündəliyinə Slovakiya və Latviyada vəziyyət, Rusiyada ölüm cəzasının ləğvi, və Bosniya və Herseqovinada bu yaxınlarda keçirilmiş monitorinqin yekunlarına dair məsələlər də daxil edilib.
Eyni zamanda o da bildirilir ki, noyabrın 25-də Buxarestdə AŞ PA Parlament Komissiyası daimi komissiyasının iclası keçiriləcək və burada da 6 noyabr parlament seçkilərinin nəticələri müzakirə olunacaq.
İclasda AŞ PA monitorinq nümayəndə heyətinin rəhbəri, hollandiyalı parlamentari Leo Platvoet Azərbaycan Milli Məclisinə seçkilərə dair məruzə ilə çıxış edəcək.
Bundan başqa, Rumıniya XİN-in başçısı Mixay-Rezvan Unquryanu (Mihai-Razvan Ungureanu) ilə fikir mübadiləsi aparılacaq.