Azərbaycan parlamentində beş müxalifətçi millət vəkilindən yaradılan qrup müsavatçı həmkarlarına birgə fəaliyyət göstərməklə bağlı təklif edəcək. Bu barədə Trend ə müxalifət qrupunun üzvü Böyük Quruluş Partiyasının (BQP) sədri, millət vəkili Fazil Qəzənfəroğlu bildirib.
F.Qəzənfəroğlu qeyd edib ki, artıq parlamentdə müxalifət qrupu formalaşıb, ikinci eyni formada qrupun yaradılmasına ehtiyac yoxdur: "Müsavatçılar parlamentdə hələ tam tərkibdə fəaliyyət göstərmir. Əgər onlar bu tərkibi tam formalaşdırsalar və ayrıca qrup kimi fəaliyyət göstərsələr belə istənilən effekt alınmayacaq. Çünki onların yaradacağı qrup və bizim yaratdığımız tərkib fraksiya hüququnu qazanmayıb. Ancaq bütün bunlara baxmayaraq hər birimiz müxalifət mövqeyindən çıxış edəcəyik".
BQP sədri onu da bildirib ki, hələlik birgə fəaliyyət göstərməklə bağlı nə müsavatçı millət vəkilləri onlara, nə də onlar müsavatçılara təkliflər etməyiblər: "Biz bu təkliflə onlara müraciət edəcəyik. Təklifimizi qəbul etməsələr də biz öz fəaliyyətimizi davam etdirəcəyik".
"Parlamentdə iki müxalifət qrupunun fəaliyyəti müxalifətin ümumi fəaliyyətinə mənfi təsir göstərəcəkmi" sualını cavablandıran F.Qəzənfəroğlu bildirib: "Xeyr. Çünki müsavatçı millət vəkillərinin sayı 10-a çatsa belə fraksiya yarada bilməyəcəkləri bunu deməyə əsas verir".
Qeyd edək ki, parlamentdə təmsil olunan müsavatçılar "Müsavat qrupu" adı altında fəaliyyət göstərəcəklərini bildiriblər.