Hazırda Bakı-Tbilisi-Ceyhan (BTC) neft kəmərinin tikintisi üzrə işlər sona çatmaqdadır. Trend in AzərTac-a istinadən verdiyi məlumata görə, bu barədə Azərbaycan prezidenti İlham Əliyev Türkiyənin "NTI" telekanalına verdiyi müsahibəsində bildirib.
BTC layihəsinin başa çatdırılmasında ləngimələrlə bağlı suala cavab verərkən dövlət başçısı bildirib ki, müəyyən yubanmalar baş verir. "Lakin bunun da təbii olması mümkündür. Çünki söhbət çox böyük və nəhəng tikintidən gedir. Daha doğrusu, 3 dövləti, 2 dənizi birləşdirən transmilli layihə, onun tikintisi, mühəndis işləri - həddən artıq çətindir. Biz də bunun mümkün qədər tez başa çatmasını istərdik", - deyə o bildirib.
İ.Əliyev ötən ilin mayında Bakıda böyük mərasimin keçirildiyini və ilk neftin kəmərə vurulduğunu xatırladıb. "Hazırda neft tamamlama işlərinin aparıldığı Türkiyəyə çatıb. Ümid edirəm ki, yaxın vaxtlarda biz Ceyhanda kəmərin açılışını qeyd edəcəyik", - deyə o əlavə edib.
Prezident həmçinin, Türkiyə-Azərbaycan əlaqələrinin bütün istiqamətlərdə uğurla inkişaf etdiyini bildirib. "Bizim siyasi sahədə çox yaxın dostluq, qardaşlıq münasibətlərimiz var. Biz iqtisadi sahədə iri layihələr həyata keçiririk. Eyni zamanda, energetika sektorunda. Sizə məlum olduğu kimi, Azərbaycanın təbii ehtiyatları dünya bazarına Türkiyə vasitğəsilə tədarük ediləcək. Bizim mədəniyyət sahəsində də əlaqələrimiz böyük əhəmiyyətə malikdir. Daha doğrusu, bu siyasət Azərbaycanda bütün sahələrdə davam etdirilir və ümid edirəm ki, gələcəkdə də davam etdirilək", - deyə İ.Əliyev bildirib.