Müsavatçı millət vəkillərinin parlamentdə yaratdığı qurupda təmsil oluna bilmərik. Bu barədə Trend ə Böyük Quruluş Partiyasının sədri, millət vəkili Fazil Qəzənfəroğlu bildirib.
Qeyd edək ki, martın 1-də Müsavat Partiyasının parlamentdə təmsil olduğu 4 millət vəkili -Nəsib Nəsibli, İkram İsrafil, İltizam Əkbərli və Arzu Səmədbəyli ilə yanaşı Pənah Hüseynin iştirakı ilə qrup yaradılıb.
F.Qəzənfəroğlu bildirib ki, onların təmsil olduqları müxalifətçi deputat qrupundan heç kəs müsavatçılara qoşulmayacaq: "Parlamentdə ümumi müxalifət formatı yaranarsa birgə fəaliyyət göstərə bilərik. Amma bizim müsavatçıların yaratdığı qrupda fəaliyyət göstərməyimiz mümkün deyil".
Onu da bildirək ki, F.Qəzənfəroğlunun təmsil olduğu müxalifətçi deputatlar qrupunda daha 5 millət vəkili fəaliyyət göstərir. F.Qəzənfəroğlu onu da bildirib ki, martın 3-də saat 11.00-da qrupun növbəti toplantısı keçiriləcək. Bir sıra məsələlərin həll olunacağını deyən millət vəkili qrupun yeni koordinatorunun da seçiləcəyini söyləyib: "Yanvar ayında qrupun koordinatoru vəzifəsini millət vəkili İqbal Ağazadə, fevralda isə millət vəkili Qüdrət Həsənquliyev həyata keçirib. Mart ayında isə bu vəzifəni millət vəkili Aynur Camalqızı yerinə yetirə bilər".