Avqustun 21-də yenidən təyin edilmiş Moldovanın Azərbaycandakı fövqəladə və səlahiyyətli səfiri İon Rabu öz təyinatı haqqında etimadnamələrin surətlərini Azərbaycanın xarici işlər naziri Elmar Məmmədyarova təqdim edib. Bu barədə Trend ə səfirliyin birinci katibi Pyotr Timuş bildirib.
Onun sözlərinə görə, görüşdə Azərbaycan və Moldova arasında ikitərəfli siyasi, iqtisadi və mədəni münasibətlərin perspektivləri müzakirə edilib. O cümlədən, Moldova və Azərbaycanda ictimai-siyasi vəziyyət üzrə informasiya mübadiləsi aparılıb, hər iki ölkə ərazisində dondurulmuş münaqişələrin həlli məsələləri, beynəlxalq və regional təşkilatlar çərçivəsində əməkdaşlığın genişləndirilməsi perspektivləri müzakirə edilib. Tərəflər həmçinin energetika sahəsində əməkdaşlığın perspektivlərini gözdən keçirib.
Ehtimal olunur ki, səfir bu günlərdə etimadnamələri ölkə prezidenti İlham Əliyevə təqdim edəcək.
