"Bayva" MMC fəaliyyətini dayandırdıqdan sonra Azərbaycanın cənub rayonlarının elektrik təchizatını təşkil etmək bu ilin martında "Azərenerji"nin Əlibayramlı Regional Enerji Təchizatı İdarəsinə həvalə edilib. Hazırda Salyan paylayıcı elektrik şəbəkəsi də onun tabeliyindədir.
"Azərenerji" bu il iyulun 17-dən Salyanda əsaslı işlər görməyə başlayıb. Belə ki, "Bayva"nın quraşdırdığı sayğaclar kənar müdaxilələrə qarşı etibarsız olduğu üçün elektron tipli yeniləri ilə əvəz olunaraq sipkabellərə birləşdirilib.
"Azərenerji" Salyana 70 nəfərlik briqada ezam edib. Energetiklər beşi qülləli, ikisi kranlı olmaqla 12 avtomaşinla və digər müasir avadanlıqlarla təchiz ediliblər. Şirkət yüksəkgərginli elektrik xətlərini xüsusi kabellə əvəz etməyə başlayıb. Hazırda Salyanın Xurşud, Aşağı Noxudlu, Yuxarı Noxudlu, Kürkənd kəndlərində sayğaclaşdırma işlərini başa çatdırıb. Salyan şəhərində, Şorsulu, Arbatan, Sarvan kəndlərində isə işlər davam etdirilir. "Azərenerji" tikinti idarəsinin rəisi Heybət Mustafayevdən aldığımız məlumata görə, Salyanda cəmi 25 günə 14 km süpkabel quraşdırılıb. Bütövlükdə isə 26 km nəzərdə tutulur.
Yaxın günlərdə başlanmış işlərin keyfiyyətlə başa çatdırılacağı gözlənilir.