Moskvada Avropa Şurası Parlament Assambleyasının Siyasi işlər Komitəsinin "Demokratiyanın qurulmasında siyasi partiyaların rolu" mövzusunda forumu ilə bağlı Xüsusi Komitənin iclası keçirilib. Bu barədə Trend ə Vətəndaş Həmrəyliyi Partiyasının sədri, millət vəkili Sabir Rüstəmxanlı bildirib.
S.Rüstəmxanlı iclasda Avropada siyasi partiyaların, ümumiyyətlə demokratiyanın vəziyyətinin, bu sahədə yaranmış problemlər və onların aradan qaldırılmasında partiyaların rolu barədə məsələlərin müzakirə olunduğunu bildirib: "Bəlli olub ki, Avropanın bütün ölkələrində Azərbaycanda gedən proseslərə bənzər proseslər gedir". Millət vəkili onu da qeyd edib ki, ümumi plenar yığıncaqda qurum tərəfindən təyin edilən məruzəçilərin məruzələrindən sonra üç bölmədə müzakirələr aparılıb. Birinci bölmədə Əli Əhmədov, ikincidə Sabir Rüstəmxanlı çıxış edib: "Çıxışımda vurğuladım ki, demokratik proseslərin ləngiməsinin bir səbəbi Avropanın bu məsələlərə ikili standartlardan yaynaşmasıdır. Demokratik proses adı altında bəzən əslində demokratiyaya aidiyyatı olmayan addımların atılmasıdır".
Onu da bildirək ki, iclasda Milli Məclisin beynəlxalq münasibətlər və parlamentlərarası əlaqələr daimi komissiyasının sədri, parlamentin AŞPA-dakı daimi nümayəndə heyətinin rəhbəri Səməd Seyidov, millət vəkilləri - hakim Yeni Azərbaycan partiyası sədrinin müavini-icra katibi Əli Əhmədov, Vətəndaş Həmrəyliyi Partiyasının sədri Sabir Rüstəmxanlı və Vətəndaş Birliyi Partiyasının sədri Sabir Hacıyev iştirak edib. Tədbirə Müsavat partiyasından nümayəndə dəvət olunsa da iştirak etməyib. Politoloq Eldar Namazov isə müstəqil şəkildə tədbirə qatılıb.
Müxtəlif ölkələrin siyasi partiya və ictimai birlik nümayəndələrinin təmsil olunduğu forum Rusiya Dövlət Duması və Avropa Şurası Parlament Assambleyası tərəfindən təşkil edilib..
