Gəncədə qurulan 32 liftdən 15-i bir neçə gündən sonra istifadəyə veriləcək. Bu barədə məlumatı Trendin Qərb Bürosuna Gəncə şəhər Mənzil Kommunal Təsərrrüfatı İstehsalat Birliyinin rəisi Abid Əliyev verib.
O bildirib ki, liftlərin işə salınması üçün xüsusi komisiya yaradılıb və texniki baxışdan sonra onlar istifadəyə veriləcək. "Bakı Qafqaz Holdinq Şirkətinin Gəncədə lift quraşdırılması üzrə rəhbəri ilə danışıqlarımız oldu. Və onlar da bizə dəstək verdilər. Artıq texniki cəhətdən tam hazır olan 15 lifti istifadəyə verəcəyik. Qalan 17-si isə 2007-ci ilin ilk ongünlüyündə istismara veriləcək" - deyə A.Əliyev bildirib.
A.Əliyev onu da qeyd edib ki, yaxın vaxtlarda Gəncədə yeni liftlərə nəzarət qurumu da fəaliyyətə başlayacaq.
Birlikdən verilən məlumata görə, 32 yeni liftdən 11 ədədi Yeni Gəncə yaşayış massivində, 10-u Mahrasa bağı ərazisində, 3-ü Muxtar Hacıyev, 3-ü Vəli Xuluflu küçələrində, 3-ü Şah İsmayıl Xətai prsopektində, qalanı isə Abbas Səhhət qəsəbəsindəki binalarda quraşdırılıb. 2007-ci ilin sonunadək Gəncə şəhəri üzrə çoxmərtəbəli yaşayış binalarında ümumilikdə 106 ədəd liftin quraşdırılması nəzərdə tutulub.
