Azərbaycan Yolu Siyasi Hərakatının (AYSH) sədri İlqar Qasımov Moldovada avtomobil qəzasına düşüb və Dubassarı şəhər xəstəxanasına çatdırılıb. Bu barədə Trend ə Hərəkatın sədr müavini Şəmsəddin Əliyev məlumat verib.
O bildirib ki, ötən il dekabrın 28-də Moldova vaxtıyla saat 14:00 radələrində Kişiniyovdan Ukraynanın paytaxtı Kiyev şəhərinə gedərkən Moldava-Ukrayna magistiralının 50-ci kilometrliyində, Dubassarı şəhərinin ərazisində avtomobil qəzasına uğrayıb. Hadisə İ.Qasımovun Kişiniyovda keçirdiyi mətbuat konfransından bir neçə saat sonra baş verib. O, GUAM ölkələrində fəaliyyət göstərən bir neçə siyasi təşkilatın yaratdığı Koordinasiya Şurasının sədri kimi qurumun Kiyevdə təmsil olunan nümayəndələri ilə görüşə gedirmiş.
İ.Qasımovun bu gün - yanvarın 10-da Moldovanın Dubassarı şəhər xəstəxanasından Moskva şəhərindəki xəstəxanalardan birinə köçürüləcəyi gözlənilir.
Ş.Əliyev onu da bildirib ki, ağır yol qəzasına iri tonnajlı sement daşıyan "KamAZ" markalı yük avtomobilinin AYSH sədrinin və Ukraynanın Odessa vilayəti qanunverici orqanının sədr müavininin olduğu "755-99 OK" dövlət nömrə nişanlı, "Audi" markalı avtomobili arxadan vurması səbəb olub. "KamAZ" "Audi"ni İ.Qasımovun əyləşdiyi istiqamətdən vurub. Nəticədə "Audi" yoldan çıxıb və ağaca dəyib. İ.Qasımov və salondakılar müxtəlif dərəcəli ağır bədən xəsarətləri alıblar. Xəstəxanada İ.Qasımovun üzərində cərahiyyə əməliyyatı aparılıb.
Faktla bağlı Moldavanın yerili hüquq-mühafizə orqanları araşdırmaya başlayıb.
Xatırladaq ki, İ.Qasımov Rusiya Federasiyasının ədliyyə general-leytenantıdır. O, həm də GUAM ölkələri siyasi partiyalarının Koordinasiya Şurasının sədridir.