"Türkdilli dövlətlərin Parlament Assambleyasının yaradılması zəruridir." Bu sözləri Trend ə açıqlamasında müxalifətyönlü Vətəndaş Həmrəyliyi Partiyasının (YAP) sədri, millət vəkili Sabir Rüstəmxanlı deyib.
Onun sözlərinə görə, indiki geosiyasi vəziyyətdə türkdilli dövlətlərin Parlament Assambleyasının yaradılması türkdilli ölkələr arasında əlaqələrin möhkəmlənməsinə xidmət edər.
S.Rüstəmxanlı Milli Məclis sədri Oqtay Əsədovun qarşısında sözügedən təşəbbüsü qaldırmaq niyyətindədir.
"Mən istərdim ki, spiker türk dövlətlərinin parlament sədrləri ilə görüşündə bu təşəbbüsü irəli sürsün. Bu ideyanın spiker tərəfindən irəli sürülməsi Türkdilli dövlətlərin Parlament Assambleyasının yaradılmasını sürətləndirə bilər",-deyə Sabir Rüstəmxanlı vurğulayıb.
Xatırladaq ki, VHP Milli Azadlıq Hərəkatının liderlərindən olan Sabir Rüstəmxanlının rəhbərliyi altında 1992-ci il 26 sentyabrda bir qrup ziyalı tərəfindən yaradılıb. 3 noyabr 1992-ci ildə dövlət qeydiyyatına alınan partiyanın 80 rayonda yerli təşkilatı fəaliyyət göstərir, 35 mindən artıq üzvü var. VHP 1995, 2000, 2005-ci ilin parlament, 2003-cü ilin prezident, 1999, 2004-cü ilin bələdiyyə seçkilərində iştirak edib. Partiyanın sədri millət vəkili, xalq şairi S.Rüstəmxanlı 1991-95-ci illərdə mətbuat və informasiya naziri, 2003-cü il prezident seçkilərində isə prezidentliyə namizəd olub. Hazırda VHP növbəti IV qurultayına hazırlaşır.
