Fevralın 13-də müxalifətyönlü "Azadlıq" bloku Sədrlər Şurasının növbəti iclası keçiriləcək və iclasda Azərbaycan Demokrat Partiyasında (ADP) yaranmış vəziyyət müzakirə olunacaq. Bu barədə Trend ə açıqlamasında "Azadlıq" blokunun həmtəsisçilərindən biri olan Vətəndaş və İnkişaf Partiyasının (VİP) sədri Əli Əliyev məlumat verib.
Ə.Əliyev qeyd edib ki, "Azadlıq" blokunda təmsil olunan digər partiyaların sədrləri ADP-də yaranmış vəziyyəti özləri üçün tam aydınlaşdırıblar. Blokun Sədrlər Şurasının iclasında məsələ müzakirə olunacaq və ADP-ni "Azadlıq" blokunda kimin təmsil edəcəyinə dair qərar qəbul olunacaq.
Xatırladaq ki, "Azadlıq"ın təsisçilərindən biri olan ADP-ni blokun Sədrlər Şurasının iclaslarında indiyə qədər partiya sədrinin birinci müavini Sərdar Cəlaloğlu təmsil edib. ADP sədri Rəsul Quliyev fevralın 10-da imzaladığı sərəncamla Sərdar Cəlaloğlunu müavin vəzifəsindən azad edib və Ali Məclisin sədri Akif Şahbazovu ADP-nin "Azadlıq" blokundakı nümayəndəsi təyin edib. Lakin ADP rəhbərliyi və Sərdar Cəlaloğlu bu qərarı tanımır.
Qeyd edək ki, Akif Şahbazov "Azadlıq" bloku Sədrlər Şurasının bu gün keçirilən iclasına qatılacağını bildirib.
Əli Əliyev isə Akif Şahbazovun blokun Sədrlər Şurasının iclasına qatılmaq niyyətinə münasibət bildirməkdən imtina edib: "Biz ADP-nin legitim sturukturları ilə əməkdaşlıq edəcəyik." O, A.Şahbazovu ADP-nin legitim sturukturdlarının nümayəndəsi kimi tanıyıb-tanımadıqlarına dair suala cavab verməkdən imtina edib.
Qeyd edək ki, "Azadlıq" blokunda 4 müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur.
