Azərbaycan, Bakı / Trend müxbir İ.Əlizadə/ Yeni Azərbaycan Partiyası (YAP) Sabunçu rayon təşkilatının VI konfransı keçirilib. Bu barədə YAP mətbuat xidmətindən məlumat verilib. Mandat komissiyasının məlumatına əsasən, 94 ilk partiya təşkilatında keçirilən hesabat-seçki yığıncaqlarında konfransa 350 nümayəndə seçilib. Konfransda YAP Sabunçu rayon təşkilatının sədri Vahid Qurbanov hesabat məruzəsi ilə çıxış edib. V.Qurbanov bildirib ki, YAP Sabunçu rayon təşkilatı hesabat dövrü ərzində fəaliyyətini partiyanın III qurultayından irəli gələn vəzifələr əsasında qurub, təşkilatın sıraları bu müddət ərzində daha da təkmilləşib. Nəzarət təftiş komissiyasının sədri Arif Qəribovun hesabatı dinlənildikdən sonra hər iki məruzə ətrafında müzakirələr aparılıb.
YAP İdarə Heyətinin üzvü, millət vəkili Nizami Xuduyev, YAP Siyasi Şurasının üzvü, Sabunçu rayon icra hakimiyyətinin başçısı Əlibaba Əliyev çıxış edərək, bildiriblər ki, uğurlarla yanaşı problemlər də qeyd edilməli, təkliflər irəli sürülməlidir. Qeyd olunub ki, Azərbaycan bu gün iqtisadi göstəricilərinə görə dünyanın diqqət mərkəzindədir. "Hər bir siyasi partiyanın əsas vəzifələrindən biri də ölkədə keçirilən seçki proseslərinə qatılmaq və uğur qazanmaq üçün səylər göstərməkdir" deyən natiqlər bildiriblər ki, bu gün partiya üzvlərinin qarşısında duran əsas vəzifə 2008-ci il prezident seçkilərinə hazırlıq işlərini yüksək səviyyədə təşkil etməkdir. Gündəliyə uyğun olaraq konfransda təşkilatı məsələlərə də baxılıb. Mehriban Abbasquliyeva açıq səsvermə yolu ilə YAP Sabunçu rayon təşkilatının sədri seçilib. Konfransda həmçinin rayon təşkilatının 35 nəfərdən ibarət şurası müəyyənləşib. Sonda konfrans iştirakçıları adından Azərbaycan Respublikasının prezidenti, Yeni Azərbaycan Partiyasının sədri İlham Əliyevə müraciət qəbul olunub.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildir ki, hakim partiya olan YAP-ın sədri prezident İlham Əliyevdir.
