Azərbaycan, Bakı / Trend müxbir İ.Əlizadə/ BMT-nin Uşaq Fondu Azərbaycanda yeni proqramlar reallaşdırmaq istəyir. Bu haqqında BMT-nin Uşaq Fondunun (YUNİSEF) Mərkəzi və Şərqi Avropa, MDB və Baltikyanı ölkələr üzrə regional ofisinin direktoru Mariya Kalivis martın 12-də Milli Məclis sədrinin müavini Bahar Muradova ilə görüşündə məlumat verib Bu barədə Milli Məclisin mətbuat xidmətindən məlumat verilib.
Vitse-spiker bildirib ki, Azərbaycan beynəlxalq qurumlar arasında özünəməxsus yeri olan BMT ilə əlaqələrin inkişafına çox böyük əhəmiyyət verir. Ölkəmizdə uşaq hüquqlarının qorunması sahəsində beynəlxalq təşkilatlarla birgə bir sıra proqramlar həyata keçirilib.
"Milli Məclisin YUNİSEF-lə əlaqələri yüksələn xətlə inkişaf etməkdədir. Azərbaycan hökuməti ilə BMT Uşaq Fondu (YUNİSEF) arasındakı sazişin 2003-cü ilin mayında parlamentdə təsdiqlənməsi uşaq hüquqları sahəsində beynəlxalq təşkilatlarla əməkdaşlığın inkişafına yeni impuls verib", -deyə B.Muradova vurğulayıb.
Qonaq təmsil etdiyi təşkilatın Azərbaycanla əlaqələrindən məmnun qaldığını bildirib. Qeyd edib ki, Azərbaycandakı dinamik inkişaf, ölkədə uşaq hüquqlarının qorunması ilə bağlı qəbul olunan qanunlar bu sahədə gələcəkdə də yüksək nəticələr əldə ediləcəyindən xəbər verir.