Azərbaycan, Bakı / " müxbir İ.Əlizadə/ "Alternativ hərbi xidmət haqqında" qanun layihəsi üzərində iş davam etdirilir. Bu barədə məlumat verən Milli Məclisin İnzibati və hərbi qanunvericilik şöbəsinin müdir müavini Səyyad Kərimov bildirib ki, "Alternativ hərbi xidmət haqqında" qanun qəbul olunmamışdan əvvəl bir sıra məsələlərə aydınlıq gətirilməlidir.
Şöbə müdiri hesab edir ki, problem bu qanunun qəbul olunması deyil, onun tətbiqindədir. Alternativ hərbi xidmətin kimlərə şamil olunacağı, onların harada xidmət edəcəkləri kimi məsələlərə aydınlıq gətirilməlidir. Onun fikrincə, ilk növbədə alternativ hərbi xidmət şamil olunacaq şəxslərin dairəsi müəyyənləşdirilməlidir. Bundan başqa, alternativ xidmətin hansı növləri olacaq, həmin şəxslər hansı işlər görəcəklər, bu işlərin görülməsinə kimlər və hansı qaydada nəzarət edəcək kimi məsələlər də açıq qalır. Bütün bunlar həm qanunvericilik bazasının yaradılmasını, həm hüquqi mexanizmilərin müəyyən olunmasını, həm də müvafiq inistututların təsis olunmasını tələb edir.
"Alternativ hərbi xidmət haqqında" qanun layihəsinin ilkin variantı rəy verilməsi üçün Avropa Şurasına da göndərilib. Lakin qurumun qanuna verdiyi rəy hələlik açıqlanmır. Azərbaycan Avropa Şurasına daxil olarkən öz üzərinə "Alternativ hərbi xidmət haqqında" qanun qəbul etməklə bağlı öhdəlik görürüb.
