Azərbaycana səfəri çərçivəsində Rusiya Federasiya Şurasının rəhbəri Sergey Mironov bəyan edib ki, may ayında Tiflisdə Azərbaycan, Ermənistan, Gürcüstan və Rusiya FŞ spikerlərinin daxil olduğu "Qafqazın parlament dördlüyü"nün görüşü keçiriləcək. Bu barədə "İTAR-TASS" məlumat verib. Mironov bu məsələni bu gün Bakıda spiker Oqtay Əsədovla görüşündə müzakirə edəcək.
Mironov qeyd edib ki, Azərbaycan və Rusiyanı yalnız keçmiş deyil, həm də bu günkü problemlər, eləcə də Xəzər, Dağlıq Qarabağ problemlərinin həll olunmaması da bağlayır. O vurğulayıb ki, Rusiya əllərində problemin həlli açarının olduğu Bakı və Yerevanın istənilən qərarını dəstəkləməyə hazırdır.
Mironov Moskva və Bakı arasında münasibətlərin "özündə 40 müqaviləni birləşdirən yaxşı hüquqi baza"ya əsaslandığına diqqət ayırıb. Lakin spikerin fikrincə, "mükəmməliyin həddi yoxdur və bu baza yeni vəziyyətlə əlaqədar inkişaf etdirilməlidir". Buna görə də Azərbaycan və Rusiya parlamentariləri "birgə fəaliyyət üçün geniş sahə"yə malikdir, deyə o, əlavə edib.
İqtisadi münasibətlərə gəldikdə, Mironovun sözlərinə görə, "hər iki tərəf praqmatik maraqlardan çıxış edir". Bununla belə nəzərə almaq lazımdır ki, "danışqlar formatı bir-birinin marağını nəzərə almaqla hər zaman razılıq əldə etmək mümkündür".