Azərbaycan, Bakı / Trend müxbir K. Zərbalıyeva/ Ölüm cəzası ömürlük azadlıqdan məhrumetmə cəzası ilə əvəzlənmiş 10 məhkum aclığı davam etdirir. Qobustan qapalı həbsxanasının rəisi Əlizadə Hüseynov şənbə günü Trend ə açıqlamasında bildirib ki, aclıq edən məhkumların səhhətləri ilə bağlı problemləri yoxdur. Həkim nəzarətində saxlanılan məhkumlar arasında aclığı dayandıran və ya onların sırasına qoşulanlar yoxdur. Dəyanət Kərimovun mədəsində əvvəlcədən problem olduğundan rəis onun səhhəti ilə bağlı hər hansı narahatlığın olacağından ehtiyat edir.
Hüseynov dünən hüquq müdafiəçilərinin aclıq edən məhkumlarla görüşdən sonra onların aclığı dayandırmaq barədə konkret qərar qəbul etmədklərini deyib. Rəisin sözlərinə görə, məhbuslar onların problemlərinin həlli üçün hakimiyyət orqanlarından zəmanət istəyirlər. Zəmanət olacağı təqdirdə aksiyanı dayandıracaqlarını deyirlər.
Qobustan Qapalı Həbsxanasında aclıq edənlər ölüm cəzası ömürlük azadlıqdan məhrumedilmə ilə əzəvlənmiş Şakir Rzaxanov, Əli Quliyev, Dəyanət Kərimov, Elbrus İbrahimov, Rahib Məsimov, Ramil Qədirov, İntiqam Qayıbov, Yadigar Baxşəliyev, Çingiz Paşayev cəzalarının 15 ilə endirilməsini tələb edir. Ömürlük azadlıqdan məhrum edilmiş Elnur Qəhrəmanov isə barəsindəki məhkəmə hökmündən narazılıq edir.
