Azərbaycan, Bakı / Trend , müxbir İ.Əlizadə/ Məcburi köçkünlərə müavinətlərin verilməsində məhdudiyyətlər tətbiq edilməlidir. Bu barədə çərşənbə axşamı Bakıda Milli Məclisin Sosial siyasət daimi komissiyasının sədri, millət vəkili Hadı Rəcəbli məlumat verib.
"Çünki öz üzərində məcburi köçkün və ya qaçqın statusu gəzdirən adamların hamısı heç də kasıb deyil. Hesab edirəm ki, burada da ünvanlılıq təmin edilməlidir. Bunun üçünsə müvafiq orqanlar monitorinq aparmalıdır", -deyə komissiya sədri əlavə edib.
Onun sözlərinə görə, ünvanlı sosial yardımların verilməsi qaydalarında edilən dəyişikliklər az təminatlı ailələrin bundan yararlanmasına imkan verəcək: "Əgər ilk vaxtlarda ünvanlı sosial yardım almaq üçün müraciət edən şəxslərdən 17 sənəd tələb olunurdusa, indi 5 sənəd tələb olunur. Bu, olduqca proqressiv addımdır. İlk günlərdə çətinliyin olmasında süni əngəllər yox idi. Sadəcə, Azərbaycan üçün bu proses yeni olduğu üçün çətinliyin də olması təbiidir".
Azərbaycan dövləti hər ay hər bir məcburi köçkünə doqquz yeni manat məbləğində yardım verir. Belə yardım alan insanların sayı 800 mindən artıqdır.
