Azərbaycan, Bakı / Trend müxbir S.İlhamqızı/ Gürcüstan, Ukrayna, Azərbaycan və Moldova birliyinə (GUAM) daxil olan ölkələrin müxalifətyönlü partiya və hərəkatlarının Koordinasiya Şurasının növbəti toplantısı iyunun 21-24-də Bakıda olacaq. Bu barədə Koordinasiya Şurasında təmsil olunan "Azərbaycan yolu" Siyasi Hərəkatından məlumat verilib.
Koordinasiya Şurası ötən il dekabrın 7-də Ukraynada yaradılıb və GUAM-a üzv ölkələrin müxalifətyönlü siyasi təşkilatlarını birləşdirir. Koordinasiya Şurasının sədrliyi və mərkəzi qərargahı növbəlilik prinsipi ilə müəyyən olunur. Hazırda quruma "Azərbaycan yolu" Siyasi Hərəkatı sədrlik edir və mərkəzi ofisi Bakıda yerləşir.
Koordninasiya Şurasının əsas iclası iyunun 22-də olacaq. Toplantıda GUAM ölkələrinin siyasi partyaları arasında əməkdaşlığın dərinləşdiriməsi, onların birgə fəaliyyət istiqamətlərinin müəyyənləşdirilməsi, partiyalararası əməkdaşlığın GUAM ölkələrinin əməkdaşlığına müsbət təsiri məsələləri müzakirə olunacaq, həmçinin yeni üzvlük məsələsinə baxılacaq. İclasda GUAM daxilində dondurulmuş münaqişələrlə də bağlı fikir mübadiləsi aparılacaq.
