Azərbaycan, Bakı / Trend müxbir K.Zərbaliyeva/ Azərbaycan Dövlət Sərhəd Xidmətinin (DSX) rəisi Elçin Quliyevin İsveçrəyə səfəri başa çatıb. Azərbaycanın İsveçrədəki səfirliyindən çərşənbə axşamı Trend ə bildirilib ki, Quliyev iyulun12-dən 14-dək bu ölkənin Sərhəd Mühafizə Korpusunun (SMK) rəhbəri Nothun dəvəti ilə İsveçrədə səfərdə olub.
Səfər zamanı iki ölkənin sərhəd mühafizəsi orqanları arasında əməkdaşlıq məsələləri geniş müzakirə olunub, qarşılıqlı olaraq müxtəlif təlimlərdə iştirak, təcrübə mübadiləsi barədə razılıq əldə edilib və əlaqələrin daha da inkişaf etdirilməsi istiqamətində səylərin artırılmasının vacibliyi qeyd olunub.
Səfər proqramı çərçivəsində Azərbaycan nümayəndə heyəti Bazel, Veil, Testa Grigia sərhəd keçid məntəqələrində olub, İsveçrə sərhədlərinin mühafizəsinin təşkili, SMK-nın Liestal şəhərində yerləşən məktəbində təhsil doktrinası, SOFO xüsusi təyinatlı dəstənin işi və qarşısında duran vəzifələrlə, eləcə də Bern Kanton polisinin "ENZİAN" adlı xüsusi təyinatlı dəstəsinin bazası ilə tanış olub.
DSX rəisi isveçrəli həmkarını cari ilin sentyabr ayında Bakıya işgüzar səfərə dəvət edib.
İsveçrə Konfederasiyasının Sərhəd Mühafizə Korpusunun rəhbəri Noth artıq cari ilin mart ayında Bakıda səfərdə olub.