Azərbaycan, Bakı, 06 fevral / Trend , müxbir Q.Cəbiyev/ Azərbaycanın Mətbuat Şurası ölkədə fəaliyyət göstərən siyasi partiya liderlərinə müraciət etməyə hazırlaşır. Bu barədə çərşənbə günü Trend ə Şuranın sədri Əflatun Amaşov məlumat verib. Onun sözlərinə görə, müraciətdə partiyaların təbliği ilə məşğul olan qəzetlərin statusu barədə qərar verilməsi istəniləcək.
Azərbaycanda 3 minə yaxın yazılı KİV qeydiyyatdan keçib. Onlardan 600-ü dərc olunur. Qəzetlərin bir qismi isə siyasi partiyalarla bağlıdır.
Amaşov bildirib ki, siyasi partiyanın nəşri olan qəzetlər ya sırf partiya qəzeti olmalıdır, ya da partiyalarla əlaqələri tam kəsməlidir. "Çox təəssüf ki, bu gün bir sıra partiya qəzetləri özlərini cəmiyyətə ictimai-siyasi, müstəqil qəzet kimi təqdim edirlər. İstəyirik ki, partiyaların orqanı olan qəzetlər sırf partiya qəzetləri olsunlar və yalnız partiyanın fəaliyyəti ilə bağlı məlumatlar dərc etsinlər. Onlar ictimai-siyasi qəzet kimi fəaliyyət göstərirlərsə, onda partiya rəhbərləri həmin qəzetlərdən imtina etməlidirlər" Amaşov əlavə edib. Şura sədri partiya liderlərinin bu müraciətə müsbət yanaşacağına ümid edir.
Amaşov hesab edir ki, siyasi partiyaların orqanı olan qəzetlər kütləvi informasiya vasitələrinin (KİV) dövlət dəstəyi konsepiyasından yararlana bilməyəcəklər. Onun sözlərinə görə, dövlət dəstəyindən daha çox müstəqil qəzetlər yararlana biləcək.
Mətbuat Şurasının üzvləri Prezidentin İcra Aparatı təmsilçiləri ilə birgə KİV-ə dövlət dəstəyi konsepiyası hazırlayıblar. Sənəd yazılı KİV-lərə dövlət yardımının edilməsini nəzərdə tutur. Konsepsiyanın yaxın müddət ərzində ölkə prezidenti tərəfindən təsdiq olunması gözlənilir.
