Azərbaycan, Bakı, 06 fevral / Trend , müxbir K. Zərbalıyeva/ İki yüz nəfəri QİÇS-ə yoluxdurmaqda günahlandırılan 18 yaşlı azərbaycanlı Elnarə Əhmədovaya məhkəmə 9 ay azadlıqdan məhrum etmə cəzası verib.
Nəsimi rayon məhkəməsindən çərşənbə günü Trend ə verilən məlumata görə, Elnarə Əhmədova cəzasını ümumi rejimli müəssisədə çəkəcək.
Əhmədova bilə-bilə başqa şəxsi insan immunçatışmazlığı virusu ilə yoluxma təhlükəsi qarşısında qoyma (AR CM-nin140.1 maddəsi) maddəsi üzrə günahlandırılır.
O, 2003-cü ildən xəstə kimi QİÇS -lə Mübarizə Mərkəzinin qeydiyyatındadır. Ötən ilin iyulunda 200 nəfərin xəstəliyə yoluxdurulmasında şübhəli bilinərək həbs olunub. Əhmədova istintaqa ifadəsində müştərilərlə birlikdə Suraxanı, Xırdalan rayonlarındakı, Masazır və Əhmədlidəki saunalara gedib. Özünün dediyinə görə, müştərilərinin əksəriyyəti 20-25 yaşlı gənclər olub.
UNICEF beynəlxalq təşkilatı 18 yaşlı azərbaycanlı Elnarə Əhmədovanın məhkum olunması ilə əlaqədar narazılığını bildirib.
"UNICEF, insan alveri, fahişəlik və pornoqrafiyanın qurbanı olan qızla cinayətkar kimi davranılmasından narahatdır", - çərşənbə axşamı təşkilatın yaydığı məlumatda deyilir.