Azərbaycan, Bakı, 18 fevral / Trend , müxbirlər V.Məmmədov, C.Babayeva/ Gəncənin orta məktəblərində şagirdlərə hər fənn üzrə dəftərlər satılır. Məktəblərdən valideynlərə bildiriblər ki, bu dəftərlər mütləq alınmalıdır. Dəftərin qiyməti səhifələrin sayından aslı olaraq 25-50 qəpik civarındadır və bu cür dəftərlərin satışı yalnız məktəblərdə həyata keçirilir. Bu isə satış qiymətlərindən təxminən iki dəfə artıq olduğuna görə valideynlərin etirazına səbəb olub.
Gəncə şəhər Təhil İdarəsinin rəisi Mahal Əliyev Trend ə dəftərlərin satılması faktını təsdiqləyib və bu prosesin Təhsil Nazirliyi tərəfindən təşkil olunduğunu bildirib.
"Hər məktəb şagirdlərinin 20-30 faizinə dəftərlər paylanıb. Bu dəftərlər şagirdlərin fənlər üzrə anlayışları daha yaxşı yadda saxlamasına imkan verəcək" - deyə Əliyev bildirib.
Təsil Nazirliyinin ictimaiyyətlə əlaqələr şöbəsinin müdiri Bayram Hüseynzadənin bazar ertəsi Trend ə bildirdiyinə görə, məktəblərdə hər fənn üçün nəzərdə tutulan dəftərlərin satışı məcburi xarakter daşımır.
"Dəftərlərin satışı yalnız könüllü xarakter daşıdığından dəftərləri almaq istəməyən valideynlər buna məcbur edilə bilməz" - deyə Hüseynzadə bildirib.