Azərbaycan, Bakı, 29 fevral/ Trend , müxbir İ.Əlizadə/ Azərbaycan Parlamentinin İnsan hüquqları komissiyası ölkədə insan hüquqlarının vəziyyəti ilə bağlı ictimai dinləmələr keçirəcək. "Bununla bağlı Milli Məclisin rəhbərliyi ilə Böyük Britaniyanın "LİNKS" təşkilatı arasında razılıq əldə edilib. Belə dinləmələrin keçirilməsi Avropa və dünyanın bir sıra ölkələrində geniş yayılıb" - deyə cümə günü Trend a açıqlamasında Milli Məclisin İnsan hüquqları daimi komissiyasının sədri Rəbiyyət Aslanova bildirib.
Aslanova qeyd edib ki, İnsan hüquqları komissiyası müxtəlif ekspertlər tərəfindən toplanmış materialları təhlil edəcək, vətəndaşların, hüquqşünasların, məhkəmə və hökumət nümayəndələrinin mövqelərini dinləyəcək, həmçinin, yerlərə səfərlər edəcək.
"Bütün bunların ictimaiyyət və mətbuat üçün açıq olması da nəzərdə tutulur. Burada başlıca məqsəd qabaqcıl təcrübələri və məhkəmə sistemi vasitəsi ilə vətəndaşların hüquqlarının müdafiəsi prosesini öyrənməkdir" - deyə komissiya sədri əlavə edib.
Onun sözlərinə görə, bu məqsədlə nümunə olaraq Bakı şəhəri Nəsimi rayon Məhkəməsi götürülüb və "Vətəndaşların müraciətlərinə baxılması sahəsində Bakı şəhəri Nəsimi rayon Məhkəməsinin iş təcrübəsi" mövzusunda ictimai dinləmələrin keçirilməsi qərara alınıb.
Aslanova bildirib ki, layihə ilə əlaqədar Ədliyyə Nazirliyi və Ali Məhkəmə rəhbərliyi ilə danışıqlar aparılıb və rəsmi müraciətlər göndərilib. Hər iki qurum layihəni dəstəkləyib.
"Bütün vətəndaşları, Qeyri-Hökumət Təşkilatlarını, peşəkar qrupları, sahibkarları və digər maraqlı tərəfləri "Vətəndaşların müraciətlərinə baxılması sahəsində Bakı şəhəri Nəsimi rayon Məhkəməsinin iş təcrübəsi" mövzusunda öz fikir və təkliflərini martın 15-dən gec olmayaraq yazılı şəkildə bildirməyə dəvət edirik" - deyə komissiya sədri bildirib.
