Azərbaycan, Bakı, 16 aprel / Trend , müxbir K.Zərbalıyeva/ Məhkumlar arasında vərəm xəstəliyindən ölüm faktları azalıb.Bu barədə çərşənbə günü Trend a ədliyyə naziri yanında İctimai Komitənin üzvü, hüquq müdafiəçii Çingiz Qənizadə məlumat verib. Vərəmli məhkumların 3 saylı müalicə müəssisəsində keçirilən monitorinqin nəticələrini müsbət qiymətləndirən Qənizadə deyib ki, ötən il vərəm xəstəliyindən müəssisədə 45 məhkum dünyasını dəyişib. Onun sözlərinə görə, 2003-cü ildə bu göstərici 157, 2004-cü ildə 94, 2005-ci ildə 66, 2006-cı ildə 53 olub.
Komitə üzvü bildirib ki, müəssisədə müalicə olunan 950 vərəmli məhkumun 76 nəfərində vərəmin daha ağır formasıdır. Bu məhkumlar Beynəlxalq Qırmızı Xaç Komitəsinin "DOTS+" proqramı çərçivəsində müalicə olunurlar. Vərəmli xəstələrin üçü qadın, 44-ü yeni həbs olunmuş və istintaq altında olanlardır. Vərəm xəstələri arasında iki məhkum QİÇS xəstəsidir. 415 məhkum isə BQXK-nin "DOTS" proqramına uyğun müalicə kursu keçir.
Monitorinq zamanı Komitə üzvləri 20-yə yaxın məhkumla təkbətək görüşüb, onların saxlanma şəraiti, qidalanması, müalicəsi ilə tanış olublar. Məhkumlar müalicədən və saxlanma şəraitindən şikayət etməyiblər. Monitorinqin nəticəsi barədə rəy hazırlanıb ədliyyə naziri Fikrət Məmmədova təqdim olunacaq.
Qənizadə bildirib ki, gələn ay KİV nümayəndələrinin iştirakı ilə müəssisədə yenidən monitorinq aparılması nəzərdə tutulub.
Məqalənin müəllifi ilə [email protected] ünvanı ilə əlaqə saxlaya bilərsiniz