Azərbaycan, Bakı,05 may / Trend , müxbir K. Zərbalıyeva/ Azərbaycanlı millət vəkilinin Rusiyada həbs olunmuş oğlunun həbs müddəti daha iki ay uzuadılıb.
Millət vəkili İlyas İsmayılovun oğlu Etimad İsmayılovun vəkili Cərulla Ramazanov bazar ertəsi Trend a bildirib ki, Çelyabinsk Vilayət Məhkəməsi Etimad İsmayılovun barəsindəki həbs-qətimkan tədbirinin müddətini avqustadək uzadılması barədə qərar qəbul edib.
Vəkil məhkəmənin qərarından şikayət verib.
İsmayılova qarşı Rusiya Cinayət Məcəlləsinin dələduzluq və çirkli pulları leqallaşdırma maddələri ilə ittiham irəli sürülərək həbs olunub.
O, martın 25-də Bakıdan Moskvaya qayıdarkən Rusiya Federal Təhlükəsizlik Xidmətinin əməkdaşları tərəfindən Domodedovo hava limanında saxlanılıb. İsmayılovun sahibi olduğu "Avrasiya Sənaye-Maliyyə Qrupu" Məhdud Məsuliyyətli Cəmiyyətinə Çelyabinsk qubernatorunun himayəsində olan bir şirkətin 1 milyon dollar məbləğində borcu var.
İsmayılovun kassasiya şikayəti ilə bağlı çıxarılmış qərardan narazı qalan vəkil nəzarət qaydasında yuxarı məhkəməyə müraciət edəcəyini deyib.
Müəlliflə əlaqə saxlamaq üçün elektron ünvan - [email protected]
