Azərbaycan, Bakı,13 may / Trend , müxbir T.Abbasov/ Azərbaycan Silahlı Qüvvələrinin 15 yüksək rütbəli zabitinə hökm oxunub.
Ağır Cinayətlərə Dair İşlər üzrə Hərbi Məhkəmədə hakim Mirzəli Abbasovun sədrliyi ilə çərşənbə axşamı keçirilən prosesdə təqsirləndirilənlərdən yeddi nəfəri müxtəlif müddətlərə şərti cəza alaraq, məhkəmə zalından azad ediliblər.
Beş zabit minimum əmək haqqının 500 mislindən 2000 mislinədək cərimə cəzasına məhkum olunub, bir nəfərin cəza müddəti bitdiyi üçün azad edilib, Arzu İbrahimova 9, Valeh Qasımova isə 5 il azadlıqdan məhrumetmə cəzası verilib.
Dəstə üzvləri Cinayət Məcəlləsinin mütəşəkkil dəstə tərəfindən külli miqdarda mənimsəmə və israf etmə (179.3.1, 179.3.2-ci ), vəzifə saxtakarlığı (313-cü) və vəzifə səlahiyyətlərini aşma (341-ci) maddələri ilə təqsirli bilinirlər.
Azərbaycan Müdafiə Nazirliyinin Hava Hücumundan Müdafiə Qoşunları və Hərbi Hava Qüvvələrinin Şəmkir ərazisində yerləşən "N" saylı hərbi hissəsinin sabiq komandiri, polkovnik-leytenant Arzu İbrahimov bir qrup zabitlə əlbir olaraq, 2004-2005-ci illərdə hərbi hissəyə məxsus yanacaq-sürtkü məhsullarını talamaqla dövlətə külli miqdarda ziyan vurub. Hərbi hissənin yanacaq-sürtkü məhsulları xidmətinin anbardarı, gizir Valeh Qasımov hərbi hissədən taladıqları yanacağa nəzarət etmək və yanacağın maşınlara yüklənməsinə köməklik göstərmək üçün digərləri ilə əlbir olublar.
Onlar aralarında yanacağın alınması, daşınması və satılması barədə vəzifə bölgüsü aparıblar. Bundan sonra hərbçilər yanacaq-sürtkü məhsullarını gizli yolla hərbi hissədən çıxararaq, Asəf Süleymanova məxsus Dəllər qəsəbəsində yerləşən yanacaqdoldurma məntəqəsində satıblar. Qabaqcadan gəlmiş olduqları razılığa görə, əldə edilmiş pulu öz aralarında bölüşdürüblər. Yanacaq-sürtkü məhsulları xidmətinin rəisi Mehdi Abbasov çek tələbnamələrinə bilə-bilə yalan məlumatlar daxil etməklə, vəzifə saxtakarlığına yol verib.
Müəlliflə əlaqə saxlamaq üçün elektron ünvan - [email protected]