Azərbaycan, Bakı, 30 may / Trend , müxbir T.Abbasov/ Azərbaycanda qanunsuz silahlı birləşmə yaradan "Əl-Qaidə" və "Əl-Cihad" beynəlxalq terrorçu təşkilatlarla əlaqəli olan ərəb mənşəli, "Əbu Cəfər" ləqəbli İran vətəndaşı Naif Əl-bədəvi və onun rəhbərlik etdiyi 17 nəfərlik dəstənin işi üzrə hazırlıq iclası keçirilib.
Məhkəmədə cinayət işi üzrə "Əbu Cəfər" və qrupun digər üzvləri - Mirzə Babayev, Qədir Hacıyev, Vüqar Əliyev, Emin Cami, Loğman Muradov, Habil Məsməliyev, Pərviz Kərimov, Vidadi Kərimov, Adil Gərayxanov, Vitali Ağaməmmədov, Asəf Həzərov, Daniyal Abuyev, Rafael Rəhimov, "Əbdul Malik" və "Hacı" ləqəbləri ilə tanınan Elçin Əlimirzəyev və digərlərinin işinə baxılır.
İstintaqı Milli Təhlükəsizlik Nazirliyinin İstintaq Baş İdarəsi tərəfindən aparılan dəstə üzvləri Cinayət Məcəlləsinin qanunvericiliklə nəzərdə tutulmayan silahlı qrup yaratma (279.2), hakimiyyət nümayəndəsinə qarşı müqavimət göstərmə və ya zor tətbiq etmə (315.2), qabaqcadan əlbir olan bir qrup şəxs tərəfindən qanunsuz olaraq odlu silah, onun dəstləşdirici hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə (228.2.1) maddələri ilə təqsirləndirilirlər.
Hazırlıq iclasında təqsirləndirilənlərin vəkilləri hüquqlarını müdafiə etdikləri şəxslərin ittiham olunduqları maddələrin dəyişdirilməsi, onların barəsindəki həbs qərarının digər qətimkan tədbiri ilə əvəzlənməsi barədə vəsatət veriblər.
Onların vəsatətləri təmin olunmayıb.
Prokuror isə prosesin qapalı keçirilməsini məhkəmədən xahiş edib.
Məhkəmə prosesin qapalı keçirilməsi və məhkəmə baxışının iyunun 12-də başlanması barədə qərar qəbul edib.
Dəstə başçısı ötən il noyabrın 2-3-də MTN-in "Qartal" Xüsusi Təyinatlı Dəstəsi tərəfindən qrupun bir neçə üzvü ilə birlikdə həbs olunub. Həmin qrupun zərərsizləşdirilməsi üzrə hüquq mühafizə orqanları tərəfindən keçirilən birgə tədbirlər zamanı ötən il sentyabrın 26-da qrup üzvlərindən biri - Telman Abdullayev odlu silahdan atəş açaraq iki polis əməkdaşını yaralayıb və hadisə yerindən qaçıb.
Müəlliflə əlaqə saxlamaq üçün elektron ünvan - [email protected]
