Azərbaycan, Lənkəran, 05 iyun/ Trend , müxbir P.Əliyeva/ Azərbaycanın Lerik rayonunun ümumtəhsil məktəblərində müxtəlif fənlər üzrə 78 müəllimə ehtiyac var. Bu barədə Trend -a cümə axşamı rayon təhsil şöbəsinin müdiri Hüseynbala Əliyev məlumat verib.
Trend -un arayışı: Azərbaycan regionlarında müəllim çatışmamazlığı problemini aradan qaldırmaq məqsədilə, Təhsil Nazirliyi xüsusi layihə icra edir.
Əliyev bildirib ki, rayonun ucqar kənd məktəblərində 8 fənn üzrə ali təhsilli müəllim çatışmır. Ötən il bu göstərici 122 nəfər olub. "Məktəblərdə ən çox biologiya (19), fizika(17), coğrafiya (16), xarici dil (12), tarix (10) müəllimləri çatışmır", - deyə o qeyd edib.
Yanvarda Təhsil Nazirliyinə Lerik rayonu üzrə pedaqoji kadrlara olan ehtiyacla bağlı sifariş göndərilib.
Rayonda 2007-2008-ci tədris ilində 12036 şagirdin təlim-tərbiyəsi ilə 1384 müəllim məşğul olub.
Lerik paytaxt Bakıdan 300 kilometr cənubda yerləşir.
Məqalə müəllifi ilə əlaqə ünvanı: [email protected]