...

Məhkəmə Azərbaycanın sabiq nazirinə ailəsi ilə görüşə icazə verməyib

Cəmiyyət Materials 24 İyun 2008 13:58 (UTC +04:00)

Azərbaycan, Bakı, 24 iyun / Trend , müxbir K.Zərbəliyeva/ Sabiq iqtisadi inkişaf nazirinə ailə üzvləri ilə görüşə məhkəmə icazə verməyib.

Sabiq nazir Fərhad Əliyev və digərlərinin apellyasiya şikayəti üzrə çərşənbə axşamı Bakı Apellyasiya Məhkəməsində keçirilən prosesdə vəkillər bir neçə vəsatətlə çıxış ediblər.

Ağır Cinayətlərə Dair İşlər üzrə Məhkəmənin hökmü ilə əmlakı müsadirə olunmaqla sabiq nazir 10, qardaşı Rafiq Əliyev isə 9 il azadlıqdan məhrum edilib. Həmçinin məhkəmə Fərhad və Rafiq Əliyev qardaşlarının həbsdən azad olunduqdan sonra 5 il müddətinə dövlət vəzifəsi tutmalarını qadağan edən qərar çıxarıb.

Sabiq nazirin vəkili Əliyevin ailə üzvləri ilə görüşünə şərait yaradılması, sabiq nazirin qardaşı, "Azpetrol" Şirkətlər Qrupunun sabiq rəhbəri R.Əliyevin vəkili əlavə sübutların tələb edilməsi haqqında vəsatətlə çıxış ediblər.

Vəkillər birinci instansiya məhkəməsində aparılan proseslərin videoyazısının nümayişi barədə də vəsatət veriblər.

Məhkəmə vəsatətləri təmin etməyib. Proses günün ikinci yarısı davam etdiriləcək.

Sabiq iqtisadi inkişaf naziri Əliyev və onun qardaşı, "Azpetrol" şirkətinin keçmiş prezidenti R.Əliyev 2005-ci ilin oktyabrında həbs edilib. Həmin vaxt onların hər ikisi dövlət çevrilişi və kütləvi iğtişaşlar hazırlamaqda ittiham edilib.

Sonradan Əliyevə Cinayət Məcəlləsinin mütəşəkkil dəstə tərəfindən mənimsəmə (179-cu), qanunsuz sahibkarlıq (192), vəzifə səlahiyyətlərindən sui-istifadə (308), rüşvətalma (311), vəzifə saxtakarlığı (313), qardaşı R.Əliyevə isə vergi ödəməkdən yayınma (213) və qaçaqmalçılıq (206) maddələri ilə ittiham elan edilib.

Fərhad və Rafiq Əliyevlərə qarşı dövlət çevrilişi və kütləvi iğtişaşlar hazırlanması ilə bağlı elan olunan ittihamlar isə ayrıca icraata götürülüb.

Müəlliflə əlaqə saxlamaq üçün elektron ünvan - [email protected]

Xəbər lenti

Xəbər lenti