Azərbaycan, Naxçıvan, 21 iyul/ Trend , müxbir E.Məmmədov / Azərbaycan Milli Elmlər Akademiyasının (AMEA) Arxeologiya İnstitutu və AMEA Naxçıvan Bölməsinin Tarix, Etnoqrafiya və Arxeologiya İnstitutu əməkdaşlarının Ordubad rayonunda yerləşən qədim Gilan şəhərinin xarabalıqlarına (Xarab Gilan) birgə təşkil etdikləri ekspedisiya zamanı son tunc dövrünə aid 10 yeni qəbir aşkar olunub.
Bu barədə Trend -a AMEA Naxçıvan Bölməsinin ekspedisiyada iştirak edən arxeoloqu Zakir Rzayev məlumat verib.
O, qeyd edib ki, AMEA Arxeologiya İnstitutunun arxeoloqu Bəhlul İbrahimovun başçılıq etdiyi ekspedisiya qrupu iyul ayının ilk günündən etibarən ərazidə arxeoloji qazıntılara başlayıb. Qazıntı zamanı son tunc dövrünə aid dairəvi şəkildə 10 qəbir aşkarlanıb.
Arxeoloji tədqiqat aparılan ərazidə qəbirlərin aşağı hissəsində torpağın altında qalmış qədim Gilan şəhərinin qalıqlarının və xeyli maddi-mədəniyyət nümunələrinin də olduğu müşahidə edilib.
Ərazidəki ekspedisiya sentyabrın sonunadək davam edəcək.
Məqalə müəllifi ilə əlaqə saxlamaq üçün ünvan: [email protected]