...

Azərbaycanlı jurnalist İTV ilə bağlı məhkəmə qərarlarından Avropa Məhkəməsinə şikayət verib

Cəmiyyət Materials 15 Sentyabr 2008 16:13 (UTC +04:00)

Azərbaycan, Bakı, 15 sentyabr / Trend , K.Zərbalıyeva/ Azərbaycanın müxalifyönlü qəzetinin jurnalisti İctimai Televiziya ilə bağlı başa çatmış məhkəmə çəkişmələri ilə bağlı Avropa İnsan Hüquqları Məhkəməsinə şikayət göndərib.

Hüquq Maarifçiliyi Cəmiyyətinin hüquqşünası Nurlana Əliyeva bildirib ki, jurnalist Rövşən Hacıyevin  İTV-yə qarşı qaldırdığı şikayətlərdən biri şərəf və ləyaqətin müdafiəsi ilə, digəri isə informasiya sorğusunun tam cavablandırılmaması ilə bağlıdır. Hacıyev  28 avqust 2006-cı ildə tərtibçisi və redaktoru olduğu "İTV mətbuat aynasında" (məqalələr toplusu) kitabının təqdimetmə mərasimini keçirib.
Tədbir haqqında reportaj hazırlayıb efirə verən İTV-nin 28 avqust 2006-cı il "Carçı" informasiya proqramının axşam buraxılışında Hacıyevin şərəf və ləyaqətini ləkələyən, onu təhqir edən ifadələr işlənib.

Hacıyev 25 sentyabr 2006-cı ildə iddia ərizəsi ilə Yasamal rayon məhkəməsinə müraciət edərək "Carçı" informasiya proqramında efirə getmiş məlumatların ərizəçinin şərəf və ləyaqətini ləkələyən məlumatlar kimi qiymətləndirilməsi, təkzib verilməsi, dəyən mənəvi zərərə görə 50 min manat cərimə ödənilməsi tələbi ilə iddia qaldırıb.

Bakının Yasamal rayon məhkəməsi iddianı təmin etməyib.

Ərizəçi bu iş üzrə Avropa Məhkəməsinə ünvanladığı şikayətdə ölkədaxili məhkəmələrin onun Konvensiyanın ədalətli məhkəmə araşdırması hüququnu, ifadə etmək azadlığı və səmərəli hüquqi müdafiə vasitələri hüququnu, ayrıseçkiliyin qadağan olunması hüququnu pozduğunu iddia edir.
İkinci şikayət isə Hacıyevin İTV-yə ünvanladığı informasiya sorğusunun cavablandırılmaması ilə bağlıdır.

Hacıyev sorğuda İTV-yə qarşı qaldırdığı iddianın düzgün həlli üçün mühüm əhəmiyyət kəsb edən məlumatların verilməsini xahiş edib. Lakin sorğunun verilməsindən 15 iş günü keçməsinə baxmayaraq, İTV bu sorğuya cavab verməyib. Bu səbəbdən ərizəçi 16 oktyabr 2006-cı ildə informasiya verməkdən imtinanın qanunsuz sayılması barədə şikayətlə Yasamal rayon məhkəməsinə müraciət edib.

Yasamal rayon məhkəməsi onun bu şikayətini də təmin etməyib.

Müəlliflə əlaqə saxlamaq üçün elektron ünvan- [email protected]

Xəbər lenti

Xəbər lenti