Azərbaycan, Bakı, 20 oktyabr / , müxbir K. Zərbalıyeva/ Müstəqil Azərbaycan Universitetinin tələbələri toplaşmaq hüququnun pozuntusu ilə bağlı Avropa Məhkəməsinə şikayət göndəriblər.
Bu barədə bazar ertəsi tələbələrin hüquqlarının Avropa Məhkəməsində müdafiəsini həyata keçirən İntiqam Əliyev məlumat verib.
Müstəqil Azərbaycan Universitetinin bir qrup tələbəsi 27 sentyabr 2006 - cı il tarixdə Bakı Şəhər İcra Hakimiyyətinə ərizə ilə müraciət ediblər.
Tələbələr "təhsil, informasiya almaq və ədalətli məhkəmə araşdırması hüququnun kobud şəkildə pozulmasına, hakimiyyət qurumlarının məhkəmələrə təzyiqlərinə etiraz olaraq" dinc toplantı keçirmək istədiklərini bildiriblər.Tələbələr toplantının 2006 - cı il oktyabrın 5 -də saat 11.00 -dan 13.00 - dək "Təhsil sistemində korrupsiyaya son qoyulsun!", "Təhsil hüququmuz bərpa edilsin", "Saxtakarlar məsuliyyətə cəlb olunsun", "Özəl universitetlərin tələbələrinə qarşı ayrı - seçkiliyə son qoyulsun!" şüarları altında və 1000 nəfərədək şəxsin iştirakı ilə keçirilməsi nəzərdə tutulduğunu göstəriblər.
Toplantının İcra Hakimiyyətinin seçiminə uyğun olaraq, Müstəqil Azərbaycan Universitetinin və ya Azərbaycan Respublikasının Təhsil Nazirliyinin qarşısında keçirilməsinin planlaşdırıldığı bildirilib. Bakı şəhər İH tələbələrə rədd cavabı verib.
Onların toplantı keçirmək barədə ikinci müraciətləri də rədd olunub.
Tələbələr toplaşmaq azadlıqlarının təmin olunması üçün yerli məhkəmələrə müraciət etsələr də, onların şikayətləri təmin olunmayıb.
Şikayətçilər İnsan Haqları üzrə Avropa Məhkəməsinə müraciətlərində pozulmuş hüquqlarının bərpasını xahiş ediblər.
Müstəqil Azərbaycan Universiteti tələbələrinin daha bir şikayəti - təhsil hüququnun pozuntusu ilə bağlı müraciəti ötən ilin sentyabrında Avropa Məhkəməsinə göndərilib.
MAU 2005 - ci ildə təhsilin keyfiyyətinin aşağı olması və qanunsuz tələbə qəbulu həyata keçirdiyi üçün Təhsil Nazirliyi tərəfindən bağlanıb.
Müəlliflə əlaqə saxlamaq üçün elektron ünvan- [email protected]
