Azərbaycan, Bakı, 21 oktyabr / , müxbir K. Zərbalıyeva/ Ali Məhkəmə "Azadlıq" qəzetinin jurnalisti Aqil Xəlilin şikayətini təmin etməyib.
Çərşənbə axşamı Ali Məhkəmədə keçirilən prosesdə Bakı Apellyasiya Məhkəməsinin Aqil Xəlili bıçaqlamaqda ittiham olunan Sergey Strekalinin işi üzrə çıxarılan hökmdən verilən apellyasiya şikayəti üzrə hazırlıq iclasının qərarı qüvvədə saxlanılıb.
Bakı Apellyasiya Məhkəməsi prosesin məhkəmə istintaqı aparılmadan keçirilməsi barədə qərar qəbul etmişdi.
Aqil Xəlilin vəkili Elçin Sadıqov isə, hadisənin Strekalin tərəfindən törədilmədiyini əsas gətirərək, prosesə əlavə şahidlərin çağırılmasını məhkəmədən xahiş etmişdi.
Trend - un arayışı: "Azadlıq" qəzetinin müxbiri Aqil Xəlilov bu il martın 13 - də Ayna Sultanova küçəsi, 523 - ci məhəllədə yerləşən binalardan birinin yaxınlığında naməlum şəxslər tərəfindən bıçaqlanıb.
Hadisə baş verən gündən Aqil Xəlil hadisənin əvvəllər "Zeytun bağı"adlanan sahədə baş vermiş insidentlə və jurnalist fəaliyyəti ilə bağlı olması, iki nəfər şəxs tərəfindən izlənildiyini bildirib.
Baş Prokurorluğun yaydığı məlumatda isə, jurnalistin qeyri- ənənəvi cinsi orientasiyaya malik şəxslər tərəfindən bıçaqlandığı bəyan edilib.
Belə ki, Xəlilin əvvəllər tanıdığı və onunla intim əlaqədə olmuş Serqey Strekalin tərəfindən bıçaqlandığı istintaqla sübuta yetirildiyi qeyd olunub.
Sergey Strekalin Cinayət Məcəlləsinin qəsdən sağlamlığa az ağır xəsarət yetirmə (127.1) və satış məqsədi olmadan qanunsuz olaraq narkotik vasitələri əldə etmə və saxlama (234.1) maddələri ilə təqsirli bilinərək həbs olunub və məhkəmənin hökmü ilə 1 il 6 ay müddətinə azadlıqdan məhrum edilib.
Müəlliflə əlaqə saxlamaq üçün elektron ünvan- [email protected]
