Azərbaycan, Bakı, 13 noyabr / Trend , müxbir K. Zərbalıyeva / Azərbaycan Ordusunun ermənilər tərəfindən əsir götürülən əsgəri ailəsinə ikinci məktubunu göndərib.
Əsirin atası Rəhman Həsənov cümə axşamı Trend - a bildirib ki, Beynəlxalq Qıırmızı Xaç Komitəsinin nümayəndələri növbəti dəfə oğlu Rafiq Həsənovla görüşüblər və onun yazdığı məktubu ailəsinə çatdırıblar.
Müdafiə Nazirliyinin "N" saylı hərbi hissəsinin əsgəri, 1989 - cu il təvəllüdlü Həsənov Rafiq Rəhman oğlu 2008 - ci il oktyabrın 8 -də qoşunların təmas xəttində Ermənistan hərbçiləri tərəfindən naməlum şəraitdə əsir götürülüb.
Həsənov məktubda sağ - salamat olduğunu və Vətənə qayıtmaq istədiyini yazıb.
Məktub rus dilində BQXK-nin nümayəndəsi tərəfindən əsirin dilindən yazılıb.
Əsirin atası bildirib ki, oğlunun Azərbaycana qayıtmaq istəməməsi barədə yayılan məlumatlar yanlışdır və ermənilərin növbəti təxribatıdır.
Həsənovun ailəsi ona növbəti məktubu yazıb və çatdırılması üçün BQXK-nin nümayəndəsinə təqdim edib.
Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən Rafiq Həsənovun əsirlikdən azad olunması istiqamətində müvafiq tədbirlər görülür.
Məqalə müəllifi ilə əlaqə ünvanı:[email protected]
