Azərbaycan, Bakı, 24 noyabr / Trend müxbir S. Kazımlı / Bakının Yasamal rayonunun, Hüseyn Cavid, Şəfayət Mehdiyev və Landau küçələrinin kəsişməsində yerləşən 546-cı məhəlləsindəki qəzalı vəziyyətdə olduğu bildirilən (metronun "Elmlər Akademiyası" stansiyasının yaxınlığında yerləşən) binada xarici mütəxəssislər tərəfindən aparılan yoxlamalar başa çatıb. Bu barədə bazar ertəsi Trend -a binada yaşayan sakinlər məlumat veriblər.
Noyabrın 14-də Belarusun Memarlıq və İnşaat Nazirliyinin mütəxəssislərindən ibarət komissiya binada yoxlamalara başlayıb. Belarusdan gələn mütəxəsisslər bir-bir mənzillərə daxil olaraq yoxlamalar aparıblar.
Sakinlər bildiriblər ki, belaruslu mütəxəssislər ötən həftənin sonunda binada aparılan yoxlamaları yekunlaşdırıbar.
"Belarsudan gələn mütəxəssislər yoxlamalar başa çatandan sonra mənzillərdən çəkdikləri şəkilləri, ölçüləri və digər nümunələri götürərək araşdırıb, rəy vermək üçün ölkələrinə qayıdıblar", - deyə sakinlər qeyd edb.
Trend -un arayışı: Bu ilin iyul ayının 19-da sakinlərlə görüşən Yasamal rayonundakı 21 saylı Mənzil İstismar Sahəsinin rəisi Laçın Hacıyev Nazirlər Kabinetinin möhürü ilə təsdiqlənmiş sərəncamı sakinlərin diqqətinə çatdırıb. Sərəncamda göstərilib ki, Bakı şəhəri, Yasamal rayonu, akademik Şəfayət Mehdiyev küçəsi, 546-cı məhəllə, 17 ünvanında beşmərtəbəli yaşayış binasının təhlükəli vəziyyətdə olan mənzillərində yaşayan əhalinin təhlükəsizliyinin təmin olunması üçün onların digər ünvanlarda mənzil kirayələyib müvəqqəti yerləşməsi məqsədilə 36 ailənin rayon ərazisində digər ünvanlarda yerləşməsi üçün tələb olunan 6 aylıq kirayə haqları və köçürülmə xərclərinin ödənilməsi üçün 130560 manat ayrılması nəzərdə tutulur. 1 otaqlı mənzil sahiblərinə 400 manat, 2 otaqlılar üçün 500 manat, 3 otaqlı mənzil sahibləri üçün 700 manat, habelə vətəndaşların köçürülmə xərcləri üçün 1 avtoreysə görə 120 manat vəsait ödəniləcək. Sərəncamda sakinlərin yaşadıqları binanın sökülüb-sökülməməsi və yaxud da təmiri ilə bağlı heç nə öz əksini tapmayıb.
Həmin ərəfədə sakinləri qəbul edən Baş nazirin müavini Abid Şərifov onlara binanın söküləcəyini deyib. Şərifov binanın 5, 6, 7-ci bloklarının, sonrakı mərhələdə isə binanın digər 7 blokunun da söküləcəyini söyləyib. Baş nazirin müavini sakinlərə bildirib ki, gələcəkdə həmin ərazidə tikilən binada sakinlərə indiki mənzil sahələrindən 20 faiz artıq mənzillər veriləcək.
Bina 1959-cu ilin aprel ayından tikilməyə başlanılıb. 1960-cı ildə isə bina istifadəyə verilib. Həmin ildən binada Bakı Dövlət Universitetinin və Milli Elmlər Akademiyasinin professorları, alimləri və dosentləri yaşamağa başlayıblar.
Bu ilin iyun ayının 19-da gecə saatlarında bir qrup polis əməkdaşı binaya daxil olaraq 5, 6 və 7-ci blokda yaşayan 40 ailəni mənzillərdən çıxarıblar. Həmin gündən qeyd olunan bloklardakı mənzillərə verilən qaz, su və elektrik enerjisi kəsilib. Binanın təxminən 40-dan artıq eyvanı sökülüb.
Avqustun 13-də sakinlər keçirdikləri mətbuat konfransında binanın qəzalı vəziyyətdə olmadığını və evlərindən çıxmayacaqlarını deyiblər.
Yasamal rayon İcra Hakimiyyətinin nümayəndələri avqustun 14-də Şəfayət Mehdiyev küçəsində yerləşən 546-cı məhəllədəki qəzalı vəziyyətdə olduğu bildirilən 17 saylı binanın sakinlərinin evlərindən çıxmaları haqda elan vurublar. Elanda göstərilib ki, Bakı Şəhər İcra Hakimiyyəti başçısının sərəncami ilə sakinlərin müvəqqəti olaraq digər yerlərdə yaşaması üçün 6 aylıq kirayə pulu və əmlakın daşınması üçün müavinat ayrılıb. Elanda ayrılan müavinatların "Kapitalbank"ın 2 saylı Yasamal filialında sakinlərin adına açılan xüsusi hesaba köçürüldüyü qeyd edilib. Elanda avqust ayının 25-dək mənzillərin tam boşaldılması və ərazi üzrə 21 saylı Mənzil Kommunal İstismar Sahəsinin rəhbərliyinə məlumat verilməsi də əks olunub.
Sakinlər Nazirlər Kabinetinin 18 iyul 2008-ci il tarixlı sərəncamının ləğv edilməsi ilə yanaşı, Yasamal rayon İcra Hakimiyyəti və Fövqəladə Hallar Nazirliyi əməkdaşlarının sakinləri qanunsuz olaraq mənzillərindən çıxartdıqları üçün məhkəməyə müraciət ediblər. Sakinlər həmin məhkəmə iddiasında Dövlət Arxitektura Komitəsindən də şikayət ediblər. Sentyabrın 8-də sakinlərin iddiaları üzə Yasamal rayon məhkəməsində hazırlıq iclası keçirilib. Sentyabrın 8-də hakim onların iddiaları ilə bağlı Konstitusiya Məhkəməsinə sorğu göndərildiyini elan edib. Hakim bildirib ki, Nazirlər Kabinetinin sərəncamı ilə bağlı iddialara rayon məhkəmələrində baxıla bilməz. Bu səbəbdən də məsələyə hansı məhkəmədə baxılması üçün hakim qeyd olunan məhkəməyə sorğu göndərib.
Sakinlər əlavə ediblər ki, xarici mütəxəssislər yoxlamalar haqda onlara heç bir məlumat verməyiblər. "Xarici mütəxəssislər bildirdilər ki, apardıqları yoxlamaların nəticəsi haqda Azərbaycan dövlətinin aidiyyəti qrumlarına məlumat verəcəklər. Təxminən 2-3 həftiyə onların rəyi məlum olacaq", - deyə sakinlər əlavə ediblər. Sakinlər Belarusdan gələn mütəxəssislərin binanın qəzalı olub-olmaması haqda müsbət rəy verəcəklərinə inanmadıqlarını deyiblər.
Məqalə müəllifi ilə əlaqə ünvanı:[email protected]
