Azərbaycan, Lənkəran, 25 noyabr / Trend , müxbir P.Əliyeva/ Azərbaycanın cənubunda yerləşən Lənkəran rayonunda (paytaxt Bakıdan 270 kilometr aralı) stress hallarının həddən çox olması nəticəsində şəkərli diabet xəstələrinin sayı artıb.
"Sosial-iqtisadi durum, stress hallarının həddən çox olması, kalorili yeməklərin normadan artıq qəbulu xəstələrin sayının ilbəil artmasına gətirib çıxarır", - çərşənbə axşamı Trend -a Lənkəran Mərkəzi rayon xəstəxanasının baş həkiminin müavini Əbülfət Hüseynəlioğlu bildirib.
Lənkəranda 2105 şəkərli diabet xəstəsi qeydiyyatdadır. Ümumi qeydiyyatda olan şəkərli xəstələrdən 70-80 faizini 35-50 yaş arasinda insanlar təşkil edir. Beş nəfər 14 yaşadək olan uşaqlardır. 2007-ilin sonunda 494 ağır formalı xəstə qeydiyyatda olubsa, indi bu rəqəm 606 nəfərdir.
Hüseynəlioğlunun bildirdiyinə görə, 2008-ci il üçün rayon səhiyyəsinə daxil olan 240 min manat vəsaitin 50 faizi şəkərli xəstələrə ayrılıb. Lakin bu da tələbatı ödəmir. İnsulindən asılı olan 606 xəstəyə bu preparatın çatışmadığını deyən həkim, 60-70 xəstə üçün əlavə Iran İslam Respublikasından nisbətən ucuz qiymətə preparat gətizdirdiklərini bildirib.
Məqalə müəllifi ilə əlaqə ünvanı: [email protected]
