Azərbaycan, Bakı, 15 may / Trend , müxbir K. Zərbalıyeva /
Azərbaycanda iki qeyri-hökumət təşkilatı Ədliyyə Nazirliyini məhkəməyə verib.
Seçkilərin Monitorinqi və Demokratiyanın Tədrisi Mərkəzi və Regional Əməkdaşlıq və İcmaların İnkişafı Mərkəzi ictimai birlikləri nazirliyi birləşmək hüququna qanunsuz qəsdə görə günahlandırırlar.
Adıçəkilən QHT-lərin hüquqlarını müdafiə edən İntiqam Əliyev cümə günü Trend -a bildirib ki, Seçkilərin Monitorinqi və Demokratiyanın Tədrisi Mərkəzi İctimai Birliyi 1 dekabr 2008-ci ildə təsis edilib və 26 yanvar 2009-cu ildə təsis sənədləri təşkilatın dövlət qeydiyyatına alınması üçün Ədliyyə Nazirliyinə göndərilib.
Nazirliyin Hüquqi Şəxslərin Qeydiyyat və Notariat Baş İdarəsindən 12 mart 2009-cu il tarixdə Ərizəçilərə bildirilib ki, sənədlərə baxılma müddəti 30 gün artırılıb.
Həmin məktubun Ərizəçilərə göndərilməsindən 100 gün keçəndən sonra Ədliyyə Nazirliyi Hüquqi Şəxslərin Qeydiyyat və Notariat Baş İdarəsinin rəis müavini Mehman Soltanovun imzaladığı 29.04.2009-cu il tarixli məktubla təşkilatın təsis sənədlərini icra olunmadan geri qaytarıb.
Məktubda qeydiyyatdan imtina üçün 2 irad göstərilib. Məktubda qeyd olunub ki, "Hüquqi şəxslərin dövlət qeydiyyatı və reyestri haqqında" qanunun 5.4-cü maddəsinə görə protokol deyil, qurumun yaradılması və nizamnaməsinin təsdiq edilməsi haqqında qərar təqdim olunmalıdır və Nizamnamənin 1.4-cü bəndində "Qeyri-hökümət təşkilatları (ictimai birliklər və fondlar) haqqında" Qanunun adı düzgün qeyd olunmayıb.
Regional Əməkdaşlıq və İcmaların İnkişafı Mərkəzi İctimai Birliyi 28 iyul 2008-ci ildə təsis edilib. 11 avqust 2008-ci il tarixdə sənədlər qurumun dövlət qeydiyyatına alınması üçün Ədliyyə Nazirliyinə göndərilib. Həmin tarixdən bu günə qədər təsisçilər QHT-ni qeydiyyata aldıra bilməyiblər. Bu müddət ərzində nazirlik 3 dəfə təşkilatın təsis sənədlərini geri qaytarıb.
Əliyev bildirib ki, nazirlik qeydiyyatdan imtina barədə birinci cavab məktubunu ərizəçilərə 77, ikincini 94, üçüncünü isə 46 gün sonra təqdim edib.
Müdafiəçinin sözlərinə görə, qanunla Ədliyyə Nazirliyinə səlahiyyət verilib ki, müstəsna hallarda sənədlərin əlavə araşdırılması zərurəti yarandıqda, ərizəyə baxılması müddətini 30 günə qədər artırsın və nazirlik bu hüquqdan cəmi 1 dəfə istifadə edə bilər. "Bu işdə Ədliyyə Nazirliyi qanunvericiliyin həmin tələbini pozub", - Əliyev vurğulayıb.
Ədliyyə Nazirliyi qeydiyyat üçün təqdim edilən sənədləri 3 dəfə geri qaytarıb və hər dəfə yeni çatışmazlığın aşkar olunmasını əsas gətirib.
Hər iki QHT-nin təsisçiləri Yasamal rayon məhkəməsinə ünvanladıqları şikayətdə həm ölkə qanunvericiliyi, həm də İnsan hüquqlarının və əsas azadlıqların müdafiəsi haqqında Konvensiyanın 11-ci maddəsi ilə təminat verilən birləşmək hüququnun pozuntusundan şikayət veriblər. Onlar məhkəmədən Ədliyyə Nazirliyinin üzərinə QHT-ləri dövlət qeydiyyatına almaq vəzifəsinin qoyulmasını və vətəndaşların birləşmək hüququnu pozan vəzifəli şəxslərin məsuliyyətə cəlb olunmasını tələb edirlər.
2007-2008-ci illərdə Avropa İnsan Hüquqları Məhkəməsi birləşmək hüququnun pozuntusu ilə bağlı Azərbaycana qarşı 4 qərar verib (Evsiz və məzlum bakılıların, Jurnalist Araşdırmaları İctimai Birliyinin, İnsan və Mühit İctimai Birliyinin və Azərbaycan Hüquqşünasları Forumunun işi).
Ədliyyə Nazirliyinin İnsan Hüquqları və İnformasiya İdarəsinin rəisi Faiq Qurbanov cümə günü Trend -a bildirib ki, qeydiyyata alınmaq üçün müraciət edən təşkilatın təsis sənədlərində hüquqi baxımdan hansısa səhv və qüsur olarsa, onların aradan qaldırılması üçün sənədlər geri qaytarılır.
İdarə rəisinin sözlərinə görə, həmin sənədlərin geri qaytarılması ilə bağlı nazirliyin qeyd etdiyi iradların əsassız və qanunsuz sayılması həmin QHT-lərin subyektiv fikirləridir.
"Bu əsaslar qanuni də olsa, QHT-lər bunu qanunsuz hesab edəcək. Nazirliyi məhkəməyə vermək QHT-lərin hüququdur və məhkəmə həmin şikayətə baxıb obyektiv qərar qəbul edəcək", - deyə Qurbanov vurğulayıb.
Məqalə müəllifi ilə əlaqə ünvanı: [email protected]
