Azərbaycan, Bakı, 30 iyun / Trend , müxbir A.Hüseynbala /
Azərbaycan və türk diaspor təşkilatları birgə əməkdaşlığı daha da gücləndirmək niyyətindədirlər.
"İyulun 1-də Berlində yerləşən Almaniyadakı Azərbaycanlıların Koordinasiya Mərkəzində (AAKM) Azərbaycan və türk diaspor nümayəndələrinin iştirakı ilə dəyirmi masa keçiriləcək", - çərşənbə axşamı Trend -a Diasporla İş üzrə Dövlət Komitəsinin mətbuat xidmətindən bildirilib.
AAKM-in icraçı direktoru Samirə Patzer İsmayılova deyib ki, görüşün keçirilməsinin əsas məqsədi Berlindəki türk diaspor təşkilatlarını mərkəzin fəaliyyəti ilə tanış etmək, əməkdaşlığın daha sıx və səmərəli yollarını araşdırmaqdır. "Dəyirmi masada türk icmalarının rəhbərlərinə AAKM haqqında ətraflı məlumat veriləcək, alman cəmiyyətinə Azərbaycan haqqında bilgilərin vaxtaşırı ötürülməsi ilə yanaşı, türk və digər xalqların diaspor təşkkilatlarının da ölkəmiz barədə müfəssəl məlumatlandırılması yolları, türklərin və azərbaycanlıların birgə lobbiçilik fəaliyyəti müzakirə olunacaq", - məlumatda qeyd edilir.
İsmayılovanın sözlərinə görə, tədbirdə həmçinin Almaniyada doğulmuş, təhsil almış türk və azərbaycanlı gənclərin sıx ünsiyyətinin təməlinin qoyulması, onların da diaspor fəaliyyətinə aktiv qoşulmaları üçün zəruri addımların atılması barədə fikir mübadiləsi aparılacaq. Görüşdə Avropa Azərbaycanlıları Konqresinin, Almaniya-Azərbaycan Həmrəylik Cəmiyyətinin, Berlin-Bakı Rəsm Qalereyasının, Azərbaycan Kültür Ocağının, Azərbaycan-Alman Mərkəzinin rəhbərliyi, eləcə də Almaniyadakı Türk Camaatının, Türk-Alman Mərkəzinin, Türk Gənclik və İdman Mərkəzinin, Atatürk Düşüncə Mərkəzinin və türk iş adamlarının təmsilçiləri iştirak edəcəklər. Dəyirmi masaya Almaniyada təhsil alan azərbaycanlı tələbələr də dəvət olunublar.
Məqalə müəllifi ilə əlaqə ünvanı: [email protected]
