Azərbaycan, Bakı, 09 noyabr / Trend , müxbir H.Bağırov /
Azərbaycan həbsxanasında qətl törətməkdə təqsirli bilinən məhkumların məhkəməsi başlayıb.
Ağır Cinayətlərə Dair İşlər üzrə Məhkəmədən bazar ertəsi Trend -a verilən məlumata görə, Həbibulla Eldar oğlu Həbibullayev və Emin Ələsgər oğlu Hüseynovun cinayət işi üzrə məhkəmənin hazırlıq iclası keçirilib.
Təqsirləndirilən şəxslər bu ilin iyunun 26-da Ədliyyə Nazirliyi Penitensiar Xidmətin 6 saylı Cəzaçəkmə Müəssisəsində münaqişə zəminində məhbus yoldaşları Elvin Rəsul oğlu Həsənova küt alətlə vuraraq, qətlə yetiriblər.
Araşdırma zamanı məlum olub ki, bu müəssisədə cəza çəkən Hüseynov Cinayət Məcəlləsinin seksual xarakterli zorakılıq hərəkətləri törətmək (150.2.1, 150.2.4) maddəsi ilə təqsirli bilinərək 6 il azadlıqdan məhrumetmə cəzasına məhkum olunub, Həbubullayev CM-in oğurluq (177.2), soyğunçuluq (180.2), narkotik vasətələri satma, əldə etmə, gəzdirmə (234.1) maddələri ilə təqsirləndirilərək 7 il azadlıqdan məhrum ediliblər.
Həsənov CM-in tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma (332.3) maddəsi ilə 5 il azadlıqdan məhrumetmə cəzası ilə məhkum olunmuşdu.
Məhkum yoldaşlarını qətlə yetirən şəxslər Cinayət Məcəlləsinin qəsdən adam öldürmə (120.2.1, 120.2.4, 120.2.6, 120.2.11), cəzaçəkmə müəssisələrinin və ya istintaq təcridxanalarının normal fəaliyyətini pozma (317) maddələri ilə ittiham olunurlar.
Məhkəmə baxışı noyabrın 16-na təyin edilib.
Məqalə müəllifi ilə əlaqə ünvanı: [email protected]