Azərbaycan, Bakı, 24 dekabr / Trend , müxbir H.Bağırov/
Rusiya vətəndaşını qətlə yetirməkdə təqsirli bilinən azərbaycanlıya hökm oxunub.
Trend -un məlumatına görə, bu gün Ağır Cinayətlərə Dair İşlər üzrə Məhkəmənin hökmü ilə Azərbaycan vətəndaşı, 42 yaşlı İsrail Mustafayev 8 il azadlıqdan məhrum edilib.
Mustafayev Rusiya Federasiyası Komi Respublikasının Sıktıvkar şəhərində yaşayarkən, həmin şəhər sakini Şaqin Viktor Gennadiyeviçlə tanış olub və sonuncunun işlədiyi "Gamma-Industry" tikinti şirkətində işə düzəlib.
1995-ci il dekabrın 13-də aralarında yaranan mübahisə zəminində Mustafayev Şaqin Viktoru bıçaqlayaraq qətlə yetirib.
O, hadisəni törədəndən sonra Moskva şəhərinə, oradan da yaşadığı Yevlax şəhərinə gəlib.
Mustafayev uzun müddət istintaqdan yayınsa da, 2009-cu il avqustun 5-də Yevlax şəhər Polis Şöbəsinin əməkdaşları tərəfindən tutulub.