Azərbaycan, Bakı, 21 yanvar / Trend , müxbir M. Əliyev/
Sosial reklamların televiziyalarda və digər kütləvi informasiya vasitələrində pulsuz yayılması ilə bağlı reklam haqqında qanuna bir maddə əlavə oluna bilər. Bunu cümə axşamı Trend -a Milli Məclisin Sosial siyasət komitəsi sədrinin müavini Musa Quliyev bildirib.
Onu sözlərinə görə, istisnasız olaraq bütün KİV-lərdə ümumi reklamların 10 faizinin sosial reklamlara həsr olunması mümkün variantlardan biridir.
Millət vəkili hesab edir ki, ayrı-ayrı sahə qanunlarına sosial reklamla bağlı bənd əlavə etmək olar.
"Misal üçün, "QİÇS haqqında" yeni qanun layihəsində İctimai televiziya və Azərbaycan dövlət televiziyası ilə ayda 20 dəqiqə bu sahəyə aid sosial reklamların yayımı, "Siqaret çəkmənin məhdudlaşdırılması haqqında" qanun layihəsində isə televiziyalar vasitəsilə ayda 90 dəqiqəlik sosial videoçarxların yayılması nəzərdə tutulub", - Quliyev əlavə edib.
Bununla belə, millət vəkili televiziya və radio yayımları haqqında qanunda belə bir maddənin əlavə oluna biləcəyini istisna etmir.
Məqalə müəllifi ilə əlaqə ünvanı: [email protected]
