Azərbaycan, Bakı, 15 fevral / Trend , müxbir H.Bağırov/
Azərbaycan həbsxanasında qətl törətməkdə təqsirli bilinən məhkumların apelyasiya şikayətinə baxılıb.
Trend -un məlumatına görə, bu gün Bakı Apelyasiya Məhkəməsi 23 yaşlı Həbibulla Eldar oğlu Həbibullayev və Emin Ələsgər oğlu Hüseynovun apelyasiya şikayətlərinin təmin edilməməsi ilə bağlı qərar elan edib.
Ağır Cinayətlərə Dair İşlər üzrə Məhkəmənin hökmü ilə Həbibullayev 14 il, Hüseynov 15 il müddətinə azadlıqdan məhrum ediliblər.
Təqsirləndirilən şəxslər Cinayət Məcəlləsinin qəsdən adamöldürmə (120.2.1, 120.2.4, 120.2.6, 120.2.11), cəzaçəkmə müəssisələrinin və ya istintaq təcridxanalarının normal fəaliyyətini pozma (317) maddələri ilə ittiham olunublar.
Onlar ötən il iyunun 26-da Ədliyyə Nazirliyi Penitensiar Xidmətin 6 saylı Cəzaçəkmə Müəssisəsində münaqişə zəminində məhbus yoldaşları 21 yaşlı Elvin Rəsul oğlu Həsənovu küt alətlə vuraraq qətlə yetiriblər.
Müəssisədə cəza çəkən Hüseynov Cinayət Məcəlləsinin bir qrup şəxs, qabaqcadan əlbir olan bir qrup şəxs və ya mütəşəkkil dəstə tərəfindən, zərərçəkmiş şəxsə və ya başqa şəxslərə qarşı xüsusi amansızlıqla seksual xarakterli zorakılıq hərəkətləri törətmək (150.2.1, 150.2.4) maddələri ilə təqsirli bilinərək 6 il azadlıqdan məhrumetmə cəzasına məhkum olunmuşdu, Həbubullayev isə CM-in oğurluq (177.2), soyğunçuluq (180.2), narkotik vasətələri qəbul etmə (234.1) maddələri ilə 7 il azadlıqdan məhrum edilmişdi.
Həsənov isə CM-in tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma (332.3) maddəsi ilə 5 il azadlıqdan məhrumetmə cəzası ilə məhkum olunmuşdu.