Azərbaycan, Bakı, 2 sentyabr /Trend, müxbir H.Bağırov/
Azərbaycan məhkəməsi dövlətə xəyanətdə günahlandırılan Silahlı Qüvvələrin 3 hərbçisinə 37 il cəza verib.
Trend-in məlumatına görə, bu gün Ağır Cinayətlərə Dair İşlər üzrə Hərbi Məhkəmədə Müdafiə Nazirliyinin "N" saylı hərbi hissəsinin hərbçiləri - çavuş Mais Çıraqov, əsgərlər Novruz Məmmədov və Kazım Məmmədova hökm oxunub.
Məhkəmənin hökmü ilə Mais Çıraqova 13 il, Novruz Məmmədova 12 il, Kazım Məmmədova 12 il müddətinə azadlıqdan məhrumetmə cəzası verilib.
Onlar 2009-cu ilin əvvəllərində hərbi xidmətdə olarkən erməni xüsusi xidmət orqanı əməkdaşlarına hərbi hissə və Azərbaycan ordusu barədə mütəmadi məlumatlar verməkdə təqsirli biliniblər. Onlar hərbi hissədə olan şəxsi heyətin (zabit və əsgərlərin) sayını, xidmətə necə, əsasən hansı istiqamətlərə və hansı intervalla çıxdıqlarını və digər bu kimi məlumatları erməni xüsusi xidmət orqanı əməkdaşlarına ötürüblər.
Təqsirləndirilənlər əsgər yoldaşlarına qarşı seksual xarakterli hərəkətlər etməkdə də ittiham olunublar.
