Azərbaycan, Bakı, 11 sentyabr /Trend, müxbir T.Hacıyev/
Bakıda güclü yağışların yağması nəticəsində bu gün nəzərdə tutulan Azərbaycan Unibank Premyer Liqasının V turunun "Neftçi" - "Muğan" oyunu təxirə salınıb. Bu barədə şənbə günü Trend-ə Peşəkar Futbol Liqasının (PFL) prezidenti Ramin Musayev məlumat verib.
"Güclü yağış yağdığını, qarşıda Azərbaycan "A" milli yığma komandasının 2012-ci il Avropa çempionatının seçmə mərhələsi çərçivəsində rəsmi görüş keçirəcəyini və bu səbəbdən də Tofiq Bəhramov adına Respublika stadionunun ot örtüyünün pis vəziyyətə düşməməsini nəzərə alaraq "Neftçi" - "Muğan" matçı sentyabrın 14-də keçiriləcək", - Musayev deyib.
Azərbaycan paytaxtında bir gündə düşən yağıntının miqdarı aylıq normadan iki dəfə çox olub. Bu barədə şənbə günü Trend-ə Ekologiya və Təbii Sərvətlər Nazirliyinin Milli Hidrometeorologiya İdarəsinin Hidrometeoroloji Proqnozlar Bürosunun direktoru Umayra Tağıyeva məlumat verib.
Ayın 12-də gündüz vaxtlarında Qərb rayonlarından başlayaraq yağıntı kəsiləcək. Ayın 13-də isə hava yağmursuz keçəcək.